पाल्पा-२ मा सत्ता गठबन्धनबाट नेकपा (एकीकृत समाजवादी) का सोमप्रसाद पाण्डे र नेकपा (एमाले) बाट ठाकुर गैरे चुनावी प्रतिस्पर्धामा छन्।
विगतमा एउटै पार्टी एमालेमा हुँदा पाण्डेले पटक-पटक अवसर पाए भने गैरेले एक पटक पनि संसदीय चुनावमा टिकट पाएका थिएनन्।
पाण्डे २०५१, २०५६, २०६४, २०७० र २०७४ मा त्यसै क्षेत्रबाट उम्मेदवार बनेका हुन्। उनी २०६४ को पहिलो संविधान सभा चुनावबाहेक अरू सबै चुनावमा विजयी भएका थिए।
गैरेसँगै दोस्रो जनआन्दोनलबाट उदाएका समकालीनहरू मन्त्री भइसक्दा पनि पाण्डेकै प्रभावका कारण पाल्पा-२ बाट उनले सांसद बन्ने अवसर पाउन सकेनन्।
गत वैशाखमा भएको स्थानीय चुनावमा एकीकृत समाजवादीबाट पाल्पाको चुनावी कमाण्ड पाण्डेले सम्हालेका थिए भने एमालेको नेतृत्व गैरेले गरे। स्थानीय चुनावमा पाल्पाका १० वटै पालिकामा सत्तारूढ दलबीच गठबन्धन भएको थियो। पाल्पामा गठबन्धनविरूद्ध एक्लै चुनाव लडेको एमालेले १० मध्ये ६ पालिकामा जित निकाल्दै आफ्नो वर्चस्व जोगायो।
पाल्पामा एकीकृत समाजवादीले रम्भा र पूर्वखोला गाउँपालिका अध्यक्ष, बगनासकाली उपाध्यक्षसहित केही वडाहरूमा भाग पाएको थियो। एकीकृत समाजवादीले आफूले पाएको पालिकामा जित निकाल्न सकेन। पाल्पामा एमालेले वर्चस्व जोगाएपछि गैरेले पाण्डेको कमाण्डलाई पराजित गरेको चर्चा भएको थियो।
वैशाख ३० मा भएको स्थानीय चुनावमा आफ्ना पार्टी र गठबन्धनका उम्मेदवारलाई जिताउन पाल्पामा मोर्चा सम्हालेका पाण्डे र गैरे मंसिर ४ मा हुने संसदीय चुनावका लागि आफैं मैदानमा उत्रिएका छन्। गैरे एमालेबाट उम्मेदवार बनेका छन् भने पाण्डेलाई सत्ता गठबन्धनको साथ छ।
स्थानीय चुनावमा पाण्डेको कमाण्डमाथि जित निकालेका गैरेलाई सत्ता गठबन्धनका कारण संसदीय चुनावमा जित निकाल्न सहज भने छैन।
जिल्लाले नयाँ अनुहार खोजिरहेको र पाण्डेकै कारण अवसरबाट बञ्चित रहेको सहानुभूति पनि रहेकाले गैरले चुनावमा जित निकाल्ने एमाले पाल्पाका अध्यक्ष धनेन्द्रराज घिमिरेको विश्वास छ।
‘राष्ट्रियस्तरमा सरल व्यक्तित्वका कारण परिचित र जिल्लामा पनि नयाँ प्रतिनिधिको खोज हुनुका साथै क्षमता हुँदाहुँदै पनि पाण्डेकै प्रभावले अवसर नपाएको सहानुभूति ठाकुर गैरेलाई छ। उहाँप्रतिको सद्भाव र नयाँ प्रतिनिधिको चाहनाले जित निकाल्न सक्नेमा हामी विश्वस्त छौं,’ घिमिरेले भने।
एकीकृत समाजवादीका नेताहरू भने सत्ता गठबन्धनका कारण पाण्डेको जित सुनिश्चित रहेको दाबी गर्छन्।
‘पाण्डे अनुभवी र सहयोगी व्यक्तित्व भएका कारण मतदाताको भरोसा उहाँप्रति कायमै छ। त्यसमाथि यसपटक गठबन्धनको साथ रहेकाले जित्नेमा हामी ढुक्क छौं,’ एकीकृत समाजवादीका नेता यादवराज रायमाझीले भने।
स्थानीय तहको चुनावी वडाध्यक्षहरूले पाएको मत हेर्दा यो क्षेत्रमा सत्ता गठबन्धन एमालेभन्दा ४ हजार ७ सय ८० मतले अघि छ। कांग्रेसका वडाध्यक्षका उम्मेदवाहरूको मत २९ हजार ३९ छ भने माओवादी केन्द्रका उम्मेदवारहरूले ४ हजार ९ सय ९० र राष्ट्रिय जनमोर्चाको मत ८ सय ४० रहेको छ। यस्तै एकीकृत समाजवादीको मत भने ४ सय ३३ छ। स्थानीय चुनावको मत हेर्दा पाण्डेको जित कांग्रेसमै निर्भर देखिन्छ।
स्थानीय चुनावमा एमालेका वडाध्यक्ष उम्मेदवारहरूले ३० हजार ५ सय ६६ मत ल्याएका थिए। पाल्पा-२ मा एकीकृत समाजवादीलाई कांग्रेसको मत ट्रान्सफर गर्नुपर्ने चुनौती छ।
स्थानीय चुनावमा समाजवादीका कमाण्डर पाण्डे र एमालेका कमाण्डर गैरेबीचको प्रतिस्पर्धा रोचक बन्ने देखिन्छ। स्थानीय चुनावमा पाण्डेको कमाण्डलाई पराजित गरेका गैरेले प्रतिनिधि सभामा के गर्लान् निकै चासोका साथ हेरिएको छ।
