तनहुँ–१ मा राष्ट्रिय स्वतन्त्र पार्टीका उम्मेदवार स्वर्णिम वाग्लेले तनहुँवासीसँग गरिएको वाचा पाँच वर्षमा पूरा गर्ने प्रतिवद्धता व्यक्त गरेका छन्।
तनहुँको आबुखैरेनीमा आयोजित चुनावी सभालाई सम्बोधन गर्दै वाग्लेले तनहुँवासीले आफूलाई निर्वाचित गराए अर्को पाँच वर्षमा यसरी नै जनताका अगाडि जवाफदेही र उत्तरदायी भएर उभिने बताए।
‘त्यतिबेला हामी आजका मितिमा गरिएका वाचाहरू पूरा गर्यौं भन्न सक्ने अवस्थामा हुनेछौ,’ उनले भने।
उनले तनहुँको विकासका लागि आफू हरहिसाबले प्रयत्नशील रहने प्रतिबद्धता व्यक्त गरे।
वाग्लेले जनता र जनप्रतिनिधिसँग निरन्तर समन्वय गर्दै त्यहाँको विकासमा अनवरत रूपमा लाग्ने आश्वासन दिए।
उनले प्रधानमन्त्री, मन्त्री, राष्ट्रिय तथा अन्तर्राष्ट्रिय संस्थासम्म डेलिगेशन गएर तनहुँ जिल्लाको विकासका लागि माग राख्ने बताए।
‘दायाँवायाँ तपाईँहरूले नै निर्वाचित गरेका वडाध्यक्ष,मेयर, गाउँपालिकाका अध्यक्ष, उपाध्यक्षलाई लिएर तनहुँ जिल्लाको विकासको लागि म हरहिसाबले प्रयत्नशील रहन्छु,’ वाग्लेले भने।
उनले सडकदेखि शिक्षा, स्वास्थ्यलाई सुदृढ बनाउँदै रोजगारीको सिर्जनादेखि सामाजिक बेथितिहरू हटाउनका लागि भूमिका खेल्ने प्रतिबद्धता पनि व्यक्त गरे।
वाग्लेले आबुखैरेनीका सडक, गल्ली र चौताराहरूसँग आफ्नो भावनात्मक सम्बन्ध रहेको बताउँदै फरक परिस्थितीमा भएपनि त्यहाँका जनताहरुका अगाडि उभिन पाउँदा गौरवको महशुस गरेको बताए।
--1715160207.JPG)
