काठमाडौं प्रहरी परिसरको भद्रकालीमा बन्न लागेको नयाँ भवनमा ४ वटा हिरासत कक्ष रहने भएका छन् ।
प्रहरीले अपराध अनुसारको ४ वटा हिरासत कक्षसहित नयाँ भवन बनाउन लागेको हो। जसले जे अपराध गरेका हुन्छन् त्यस्तै हिरासत कक्षमा उनीहरुलाई राखिन्छ,काठमाडौंका एसएसपी उत्तम सुवेदीले जानकारी दिए।
सामाजिक अपराध गर्नेहरुलाई, लागु औषध प्रयोग र कारोबार गर्नेलाई, जघन्य अपराध गर्ने र बलात्कारका घटनामा पक्राउ परेकाहरुलाई राख्नका लागि छुट्टाछुट्टै हिरासत कक्ष बनाउन लागिएको प्रहरीले जनाएको छ।
ती हिरासत कक्ष ७ सय भन्दा बढी क्षमताको हुने छ। बन्न लागेको सुविधासम्पन्न भवनमा सोधपुछका लागि बोलाएकाहरुलाई गेटबाट प्रवेश गर्ने वित्तिकै छुट्टै कोठामा लगिने प्रहरीले बताएको छ। 'कतिपयलाई सामान्य सोधपुछका लागि बोलाउनुपर्ने हुन्छ, उनीहरुलाई अन्य अपराधीहरुसँगै राखेर सोधपुछ गर्दा उनीहरुले अपमान गरेको महसुस हामीले पाएका छौं,' काठमाडौं प्रहरीका एसपी अशोक सिहंले भने।
नयाँ बन्ने भवन वातावरणमैत्री, अपाङता मैत्री हुने उनले बताए। मंगलबार आइजिपी सर्वेन्द्र खनाले काठमाडौं प्रहरी परिसरसँगै टेकुमा अपराध महाशाखा र नेपाल पुलिस क्लवको नयाँ भवनको शिलान्यास गरे। शिलान्यास समारोहमा बोल्दै आइजिपी खनालले प्रहरीले नयाँ बन्ने भवनले उर्जा थप्ने विश्वास आफूले लिएको बताए।
'म पनि अपराध महाशाखामा काम गरेको ब्यक्ति हुँ, पालमा बसेर काम गर्दा कस्तो समस्या हुन्छ यसबारे मलाई राम्रोसँग अवगत छ खनालले भने,' 'यसरी लामो समयसम्म पालमा बसेर काम गर्ने सबै प्रहरीलाई म धन्यवाद दिन चाहन्छु ।'
- भृकुटीमण्डपमा बनाउन लागेको नयाँ भवनकाे डिजाइन
