नेपाल विश्वहिन्दु महासंघ कपिलवस्तुले कपिलवस्तुको तौलिहवामा प्रदर्शन गरेको छ।
कोभिड १९ को संक्रमण फैलन सक्ने भन्दै जिल्ला प्रशासन कार्यालयले जिल्ला भरी दुर्गा मुर्ति स्थापना, पूजा र विसर्जन कार्यमा पूर्ण रुपमा रोक लगाएको विरोधमा उनीहरुले प्रदर्शन गरेका हुन्।
महासंघले दुर्गा पूजा कार्यक्रम संचालन गर्न पाउनुपर्ने माग गरेको छ। जिल्लाको कृष्णनगर, चन्द्रौटा, महाराजगञ्ज, पकडी, तौलिहवा लगायतका स्थानका हिन्दुवादी युवाहरुले तौलिहवा बजार परिक्रमा गरी नवदुर्गाको अवसरमा आयोजना गरिने दुर्गा पूजा कार्यक्रम गर्न पाउनु पर्ने माग गरेका छन्।
नेपाल विश्वहिन्दु महासंघ कपिलवस्तुका अध्यक्ष उदयभान यादवले आफूहरुको धार्मिक परम्परालाई स्थानीय प्रशासनले रोक लगाउन नहुने बताए।
उनले प्रशासनले दुर्गा पूजा कार्यक्रम आयोजना गर्न रोक लगाए पनि आफूहरुले आफ्नो धार्मिक परम्परा कायम राख्न स्वास्थ्य सुरक्षाका उपायहरु अपनाएर कार्यक्रम सम्पन्न गर्ने बताए ।