युवा तथा तथा खेलकुद मन्त्री महेश्वर गहतराज 'अथक'ले अवसर र चुनौतीलाई ठिक ढगंबाट अगाडि लैजान सके नेतृत्व सधैं सफल हुने बताएका छन्।
काठमाडौंको चन्द्रागिरि हिल्समा सम्पन्न थानकोट जेसिजको २२ औं पदस्थापन तथा पुरस्कार वितरण समाहारोमा बोल्दै मन्त्री गहतराजले अवसर र चुनौती द्वन्द्वात्मक सम्बन्धलाई ठिक ढंगले समायोजन गराएर अगाडि बढ्न युवाहरूलाई प्रोत्साहन गरेका हुन्।
उनले नेपालमा तीनथरीका युवाहरू रहेको भन्दै देश विकासमा युवाहरू अगाडि आउनुपर्ने बताए।
शासन व्यक्तिको नभई विधिको हुनुपर्ने जोड दिँदै सकारात्मक सोचले मात्र राष्ट्र विकासमा योगदान हुने हुँदा यही देशमा केही गरौं भन्ने युवा जमातलाई सरकारले लगानी गर्ने बताए।
कार्यक्रममा कार्यकारिणी उपाध्यक्ष रमा प्याकुरेलले काठमाडौं जेसिज देशभरकै उत्कृष्ट शाखाको रूपमा सक्रिय रहँदै आएकोमा धन्यबाद ज्ञापन गरिन्।
कार्यक्रममा नेपाल जेसिजका उपाध्यक्ष योगीराज अधिकारीले हरेक कार्यको गतिविधि प्रतिफलमुखी र सकारात्मक हुनुपर्ने बताए।
चन्द्रागिरिका वडा नम्बर ४ का वडा अध्यक्ष कृष्णप्रसाद खड्गीले लोकतन्त्र र सुशासन प्रवर्द्धनमा युवाहरूले महत्वपूर्ण भूमिका निर्वाह गर्नुपर्ने बताए।
समारोहमा थानकोट जेसिज वर्ष २०२२ का अध्यक्ष रोशन दानीले यो वर्ष ‘सकारात्मक प्रभावको लागि सँगै’ भन्ने नारासहित विविध कार्यक्रम गरिने बताए।
उनले युवा उद्यमशीलता, संस्कृति प्रवर्द्धन र सामाजिक सेवाको क्षेत्रमा आगामी वर्ष प्रभावकारी कार्ययोजनासहित काम गरिने बताए।
कार्यक्रममा जेसिज नवनिर्वाचित कार्यसमितिले पदभार ग्रहण गरेको छ।
