जिल्ला प्रहरी परिसर काठमाडौंले आत्महत्या न्यूनीकरण तथा रोकथाम गर्न 'फोकल पर्सन' तोकेको छ।
आत्महत्याका घटना बढिरहेको भन्दै मंगलबार परिसरले कार्ययोजना बनाएर फोकल पर्सन तोकेको हो।
परिसरले प्रहरी नायब उपरीक्षक निरञ्जनदत्त भट्टलाई फोकल पर्सन तोकेको प्रवक्ता प्रहरी उपरीक्षक दिनेशराज मैनालीले जानकारी दिए।
प्रहरी नायब उपरीक्षक भट्टको नेतृत्वमा रेस्क्यू टोली पनि गठन गरेको छ।
कतै आत्महत्याका घटना हुन सक्ने सूचना प्राप्त हुनासाथ टोली परिचालन गरिने प्रहरी उपरीक्षक मैनालीले बताए।
यस टोलीले उद्धार गरिएका पीडितको उपचार र काउन्सिलिङको लागि चिकित्सकहरूसँग समेत समन्वय गरिने उनले बताए।
यस्तै, परिसर मातहत वृत्त, प्रभागहरू समेतमा प्रहरी निरीक्षकलाई फोकल पर्सन तोकेको हो।
तोकिएका फोकल पर्सनलाई मंगलबार नै परिसरमा नेपाल प्रहरी अस्पतालमा कार्यरत प्रहरी उपरीक्षक डा. आशिष दत्तले आत्महत्या न्यूनीकरण तथा रोकथाम एवं मानसिक स्वास्थ्यसम्बन्धी प्रशिक्षण दिएका थिए।
प्रहरीले अब सामुदायिक प्रहरी साझेदारी कार्यक्रम अन्तर्गत वृत्तहरूको ग्रसित क्षेत्र पहिचान गरी जनचेतना फैलाउन टोल-टोलमा पुग्ने र कार्यक्रम पश्चात कोही कसैलाई काउन्सिलिङ गर्न परेमा चिकित्सक समेतको नम्बर प्रदान गरिने परिसरले जनाएको छ।
कार्यक्रमबीच प्रहरी वरिष्ठ उपरीक्षक भरत बोहराले पनि तालिम लिएका प्रशिक्षार्थी प्रहरीलाई सेवाग्राहीसँग राम्रो व्यवहार गर्न समेत निर्देशन दिए।
पीडितहरू प्रहरी कार्यालयमा आउँदा उल्टै नराम्रो व्यवहार भोग्नुपरेको गुनासोहरू सुनेको भन्दै उनले व्यवहारमा सुधार ल्याउन निर्देशन दिएका हुन्।
‘प्रहरी कार्यालयमा आएका सेवाग्राहीहरूलाई हामीले सेवा दिने हो। सेवाग्राहीहरूप्रति हामीले व्यवहार सुधार गर्नुपर्छ,’ उनले भने, ‘हामीले जति छिटो हुन्छ काम सकाइदिनुपर्छ। हाम्रोबाट हुने काम होइन रैछ भने पनि यहाँ जानुहोस् भनेर पठाउने हो।’
--1715160207.JPG)
