रुकुम पश्चिममा आइतबार दिउँसो आगलागीबाट एक वृद्धाको मृत्यु भएको छ।
मृत्यु हुनेमा बाफिकोट गाउँपालिका-३ की ७१ वर्षीया बुदी कामी छन्।
आइतबार दिउँसो भत्नीगोर सामुदायिक वनबाट फैलिएको आगोले उनको दुईतले घर पनि सल्किएको थियो।
आगो निभाउने क्रममा वृद्धाको शव पनि फेला परेपछि स्थानीयले प्रहरीलाई खबर गरेका थिए।
जिल्ला प्रहरी कार्यालय रूकुम पश्चिमले दिउँसो ४ बजेतिर आगलागीमा वृद्धाको मृत्यु भएको सूचना प्राप्त भएको जनाएको छ।
त्यसपछि इलाका प्रहरी कार्यालय बाफुकोटबाट प्रहरी वरिष्ठ हवल्दार विमल शाहीको कमाण्डमा चार जनाको टोली घटनास्थल पुगेको थियो।
सोही टोलीले पौने ५ बजेतिर पूरै शरिर जलेको अवस्थामा कामीको शव निकालेको थियो।
घरको आगो नियन्त्रणमा लिने प्रयास जारी रहेको पनि प्रहरीले बताएको छ।