सिरियाली राजधानी दमास्कस नजिकै पर्ने एक इलाकामा सुरक्षाफौजबाट भएको हवाई कारवाहीमा परी कम्तीमा ३० जना सर्वसाधारणको मृत्यु भएको छ।
सिरियामा जारी करिब सात वर्ष लामो द्वन्द्वको क्रममा ठूलो संख्यामा सर्वसाधारण मारिएका छन्। पछिल्लो समयमा फेरि यहाँ नागरिकमाथिको हमलाका कार्यहरू निरन्तरजस्तै हुन थालेका छन्।
सिरियाली सरकारी सैनिकले विद्रोहीको बलियो प्रभाव रहेको भनिएको क्षेत्रलाई लक्ष्यगरी विषाक्त रासायनिक हातहतियार समेत प्रयोग गर्दै आएकाे र यसबाट पनि धेरै सर्वसाधारणले ज्यान गुमाउने गरेका छन्। यसैहप्ता पनि दमास्कसनजिकै पूर्वी इलाका घोउटामा विपक्षीको बलियो प्रभाव रहेको इलाकामा कैयौँ पटक सरकारी सुुरक्षा अधिकारीबाट विषाक्त ग्याँस आक्रमण गरेको संयुक्त राष्ट्रसंघले जानकारी दिएको छ।
गत सोमबार पनि पूर्वी इलाका घोउटामा कैयौँपटक सरकारी सुरक्षा अधिकारीले हवाई आक्रमण गरेको बेलायतआवद्ध सिरियाली अब्जरभेटरी फर ह्युम्यन राइट्सले जानकारी दिएको छ ।
यस कारबाहीमा परी २९ सर्वसाधारणको मृत्यु हुनुको साथै अन्य दर्जनौं घाइते भएका अब्जरभेटरीका प्रमुख रामी अब्दुल रहमानले एएफपी समाचारलाई बताएका छन्।
यस आक्रमण परी मारिनेमा केही बालबालिका समेत रहेका पनि रहमानले बताए। तर कतिजना बालबालिका परेका छन् भन्ने बारेमा भने केही थाहा हुन नसकेको उनको भनाइ छ।
सिरियामा सन् २०११ को मार्चबाट सुरू भएको जनआन्दोलन केही समयपछि गृहयुद्धमा परिणत भएको थियो। यस गृहयुद्धमा आतङ्ककारी समूह अल कायदा र इस्लामिक स्टेट्स हावी हुँदै गएको छ। उनीहरूको हिंसाका कारण पनि धेरै मानिस मारिएका छन्।
सन् २०११ देखि हालसम्म जारी रहेको यस सिरियाली द्वन्द्वमा परी ३ लाख ४० हजार भन्दा बढी व्यक्ति मारिएका छन्।