गैरआवासीय नेपाली संघ अन्तर्राष्ट्रिय समन्वय परिषद, मध्यपूर्व क्षेत्रीय युवा विभागले 'ग्लोबल एनआरएन सिंगिङ आइडल, सेकेन्ड जेनेरेसन – २०२१' को पहिलो सिजन आयोजना गर्ने भएको छ।
नेपाली कला, संस्कृतिको संरक्षण एवं प्रवासमा बसेर संगीत साधना गरिरहेका नेपाली प्रतिभा पहिचान एवं प्रवर्द्धन गर्ने उद्देश्यले कार्यक्रम गर्न लागिएको आयोजकले जनाएको छ।
एनआरएनए मध्यपूर्व युवा विभागका संयोजक राज रेग्मीका अनुसार एनआरएनए दोस्रो पुस्ताको यो अभियानमा ४० वर्षसम्मका नवोदित गायक–गायिका भर्चुअलमार्फत् सहभागी हुनसक्ने छन्।
'सार्क मुलुक बाहेकका, गैरआवासीय नेपाली संघ गठन भएका भएका सबै राष्ट्रबाट प्रतियोगीहरूलाई सहभागी गराइने छ,' रेग्मीले भने, 'विश्वभरका ६ वटा क्षेत्रीय समितिको सहभागिता रहनेछ। प्रत्येक क्षेत्रीय समितिबाट कम्तिमा १२ जना प्रतियोगी सहभागी हुन पाउनेछन्। ६ वटाभन्दा धेरै राष्ट्रसहितको क्षेत्रीय समिति छ, प्रत्येक राष्ट्रबाट १ प्रतियोगी थपिने छन्।'
गैरआवासीय नेपाली संघका केन्द्रीय अध्यक्ष कुमार पन्त प्रमुख सल्लाहकार एवं आयोजक क्षेत्रका क्षेत्रीय संयोजक प्रविण गुरुङको मुख्य सहकार्यमा आयोजना गरिन लागेको उक्त कार्यक्रममा गायक उदय सोताङ, गायिका सुनिता दुलाल, गायक विजय लामा र प्राश्ना शाक्य निर्णायक छन्। विवेक खतिवडाले उद्घोषण गर्ने छन्। गैरआवासीय नेपाली संघ, राष्ट्रिय समन्वय परिषद कतार होस्ट कन्ट्रीको भूमिकामा छ।
मध्यपूर्व युवा संयोजक राज रेग्मी, अध्यक्ष कुमार पन्त र मध्यपूर्व संयोजक प्रवीण गुरुङ 'ग्लोबल एनआरएन सिंगिङ आइडल सेकेन्ड जेनेरेसन – २०२१' मुख्य सहयोगीको भूमिकामा रहेका मध्यपूर्व संयोजक प्रवीण गुरुङले नेपाली संगीतकर्मीहरूले प्रवासमा रहँदा पनि आफ्नो क्षमतालाई प्रष्फुटन गर्ने अवसर सिर्जना गर्नकै लागि कार्यक्रम आयोजना गरिएको बताए।
'नेपाल आइडल, भ्वाइस अफ नेपाल, बुगी–वुगी जस्ता फ्रेन्चाइज रियालिटी शोको ग्रान्ड फिनालेलाई कतारमा सम्पन्न गर्न मैले व्यवस्थापन हेर्ने जिम्मा पाएको थिएँ। यही अनुभवका कारण मध्यपूर्व यूवा विभागले गर्न लागेको कार्यक्रम सहजीकरण गर्न सजिलो भएको हो,' गुरुङले भने।
'ग्लोबल एनआरएन सिंगिङ आइडल सेकेन्ड जेनेरेशन – २०२१' को यो पहिलो सिजन हो। हरेक कार्यकाल अर्थात् प्रत्येक दुई वर्षमा एक पटक यो कार्यक्रम हुने रेग्मीले जानकारी दिए।
'हामीले यस प्रकारको कार्यक्रम सुरूआत गरेका छौं। यसलाई निरन्तरता दिन जसरी मेरा अग्रज मध्यपूर्व संयोजक प्रविण गुरुङले सहजीकरण गरिरहनुभएको छ, त्यसैगरी अब आउने युवा संयोजकलाई मैले सहजीकरण गर्ने छु,' रेग्मीले भने।
कोरोना कहरका कारण यसपटक भर्चुअलमार्फत् गर्नुपर्ने बाध्यता रहे पनि आगामी सिजनमा अन्तर्राष्ट्रियस्तरको स्टेज तयार पारेर अन्तर्राष्ट्रियस्तरकै रियालिटी शो गर्ने योजना रहेको रेग्मीले बताएका छन्।
आइडल विजेता प्रतियोगीले दुई लाख रूपैयाँ पुरस्कार प्राप्त गर्ने छन्। द्वितीय पुरस्कार एक लाख रूपैयाँ, तृतीय पुरस्कार ५० हजार रूपैयाँ र चौथो २५ हजार रूपैयाँ रहेको रेग्मीले बताए। ग्राण्ड फिनालेमा प्रवेश पाउने ५ जना प्रतियोगीलाई गीति एल्बम्मा गीत गाउने अवसर प्रदान गरिने जानकारी उनले दिए। आगामी अप्रिल १६ र १७ तारिखमा प्रतियोगिता सञ्चालन गरिने छ।
कस्तो हुने छ प्रतियोगी छनौट प्रक्रिया ?
कार्यक्रममा तीन चरणमा प्रतिस्पर्धा गराएर विजेता घोषणा गर्ने तयारी छ। पहिलो चरणलाई डिजिटल राउन्ड भनिएको छ।
'डिजिटल राउन्डमा प्रत्येक प्रतियोगीले बढीमा २ मिनेटसम्मको सफा र प्रष्ट अडिसन भिडियो आ–आफ्नो राष्ट्रिय समन्वय परिषदलाई र रेकर्डका लागि आयोजक कमिटीलाई पनि सीसी गरी पठाउनुपर्नेछ,' संयोजक रेग्मीले भने, 'प्रत्येक राष्ट्रिय समन्वय समितिले उक्त भिडियो हेरेर क्षेत्रीय समितिलाई छनौटका लागि पठाउने छ।'
प्रत्येक क्षेत्रीय समितिले छनौट गरी कम्तीमा १२ जना प्रतियोगीको भिडियो क्लिप आयोजक कमिटीको इमेलमा (rycmiddleeast@nrna.org, rcmiddleeast@nrna.org) मिति १० अप्रिल, २०२१ सम्ममा पठाउनु पर्ने छ।
रेग्मीका अनुसार आयोजक कमिटीले प्राप्त भिडियो क्लिपलाई निर्णायक मण्डललाई पठाउने र डिजिटल अडिसनको भिडियोलाई निर्णायक मण्डलले मूल्यांकन गर्दै पहिलो चरणमा जम्मा प्रतियोगीमध्येबाट ३७ जना प्रतियोगीलाई मात्र छनौट गरी ओपनिङ राउन्डमा लैजाने छ।
छनौट भएका ३७ जना प्रतियोगीको नामावली १३ अप्रिल, २०२१ मा प्रकाशन गरी आयोजक समितिले प्रत्येक क्षेत्रीय समितिलाई जानकारी गराउने रेग्मीले बताए।
त्यसपछि ओपनिङ राउन्डलाई तीन चरणमा बाँडिने र डिजिटल राउन्डबाट छनौट भएर यस राउन्डमा प्रवेश गरेका ३७ जना प्रतियोगीमध्ये अन्तरा राउन्डबाट १२ जना प्रतियोगी बाहिरिने र २५ जनाले ओपनिङ राउन्डको सारेगम राउन्डमा प्रवेश गराउने नियम तय भएको छ।
'ओपनिङ राउन्डको सारेगम राउन्डबाट थप १२ जना प्रतियोगी बाहिरिने र बाँकी १३ जना प्रतियोगीले पियानो राउन्डमा प्रवेश पाउने छन्। ती प्रतियोगी स्वतः फाइनल राउन्डमा सहभागी हुन पाउने छन्,' रेग्मीले भने।
फाइनल राउन्डलाई पनि तीन चरणमा विभाजन गरिने छ। जसमा ओपनिङ राउन्डको पियानो राउन्डमा प्रवेश गरेका १३ जना प्रतियोगीमध्ये पहिलो चरणबाट ४ जना प्रतियोगीहरू बाहिरिने छन्। ९ जना प्रतियोगीले दोस्रो चरणमा प्रवेश पाउनेछन्। दोस्रो चरणबाट थप ४ जना प्रतियोगी बाहिरिने र अन्तिममा ५ जना प्रतियोगीले ग्राण्ड फिनालेमा प्रवेश पाउने रेग्मीले बताए।
'प्रतियोगीले ग्राण्ड फिनालेमा १–१ वटा गीत गाउनेछन्। त्यही गीतका आधारमा १ जना प्रतियोगी बाहिरिने र ४ जनालाई प्रथम, दोस्रो, तेस्रो र चौथो घोषणा गरिनेछ,' रेग्मीले भने।
