प्रधानमन्त्री केपी शर्मा ओलीलाई विश्वासको मत दिने विषयमा संसदको चौथो ठूलो दल जनता समाजवादी पार्टीको समिकरणमा फेरबदल भएको छ।
सोमबार प्रतिनिधि सभामा भएको मतदानमा जसपाका १५ सांसदले विश्वासको विपक्षमा मतदान दिएका थिए भने १५ सांसद तटस्थ बसेका थिए। दुई जना सांसद भने अनुपस्थित थिए।
जसपा सांसद प्रदीप यादवका अनुसार कोरोनाको संक्रमण भएका कारण सांसदहरू लक्ष्मणलाल कर्ण र रुही नाज बैठकमा सहभागी भएनन्।
जसपाभित्र पूर्व संघीय समाजवादी समूहका सांसद ओली सरकारको विपक्ष थिए भने पूर्वराजपा समूहका सांसद तटस्थ बस्ने पक्षमा थिए।
सोमबारको मतदानमा भने केही सांसदले पहिलाको समूह फेरबदल गरेका छन्। अध्यक्ष उपेन्द्र यादवको समूहमा रहेका सांसदहरू विमल श्रीवास्तव र उमाशंकर अरगरियाले विश्वासको मतको प्रस्तावको विपक्षमा मतदान गरेनन्, तटस्थ बसे।
त्यस्तै अर्का अध्यक्ष महन्थ ठाकुरको समूहमा रहेका भनिएका सांसदहरू महेन्द्र राय यादव र चन्द्रकान्त चौधरीले प्रस्तावको विपक्षमा मतदान गरे।
विश्वासको मत नपाएपछि काम चलाउ भएको केपी शर्मा ओली नेतृत्वको सरकारको विकल्पमा वैकल्पिक सरकार बनाउन जसपाको भूमिका महत्वपूर्ण हुन्छ।
