बृहत् नागरिक आन्दोलनले काठमाडौंको थापाथलीमा काठमाडौं महानगरले डोजर लिएर गएकोमा घोर भर्त्सना गरेको छ।
मंगलबार विज्ञप्ति जारी गर्दै आन्दोलनले सुकुम्बासी जस्तो संवेदनशील विषयलाई राज्यले अमानवीय र क्रुर दृष्टिकोणले हेर्नु निन्दनीय भएको बताएको हो।
संवाद र सहमतिबिना बसोबासको उचित र न्यायिक व्यवस्थापन असम्भव भएको आन्दोलनको ठहर छ।
‘डोजरलाई विकासको औजार मान्नेहरूको यो अलोकतान्त्रिक, अमानवीय र अन्यायी कदमको ‘बृहत् नागरिक आन्दोलन’ घोर भर्त्सना गर्दछ,’ विज्ञप्तिमा भनिएको छ, ‘बस्तीका बालबालिका, अशक्त, वृद्धवृद्धा र किरिया बसिरहेका नागरिकहरूलाई समेत बेवास्ता गरी बस्ती भत्काउन खोजियो।’
यसरी घरबासको रक्षा गर्ने क्रममा बस्तीमा मुठभेड हुनु चिन्ताजनक समेत भएको र यस्तो अवस्था सिर्जना हुन दिनु राज्य स्वयं दायित्वबाट बिमुख भएको आन्दोलनले जनाएको छ।
आन्दोलनले पछिल्लो समय भूमिहीन सुकुम्बासीको बसोबासको हक सुनिश्चित गर्न महानगरपालिका र राष्ट्रिय भूमि आयोगबीच भएको लिखित सहमति महानगरपालिकाले पालना गर्नुपर्ने जनाएको छ।
‘सहर त्यतिखेरमात्रै सुन्दर र सभ्य हुन्छ, जतिखेर नेतृत्व लोकतान्त्रिक, न्यायिक र मानवीय बन्छ। अहोरात्र सहरमा श्रम गरी तन–मन बिसाउने ठाउँसमेत नपाउने सहर जतिसुकै भव्य देखिए पनि वास्तविकतामा भव्य र सुन्दर हुन सक्दैन,’ आन्दोलनले भनेको छ।
1669627939.jpeg)
