सर्वोत्तम सिमेन्ट र रिलायन्स स्पिनिङ मिल्सको सेयर बुक बिल्डिङ प्रक्रियाबाट मूल्य निर्धारणको लागि प्रक्रियामा गएको छ।
सर्वोत्तम सिमेन्टले आफ्नो प्रतिकित्ता सेयरको मूल्य पाँच सय एक रूपैयाँदेखि सात सय ५१ रूपैयाँ ५० पैसा, रिलायन्स स्पिनिङ मिल्सले ६ सय रूपैयाँदेखि ९ सय १२ रूपैयाँ तोकेको छ।
सर्वोत्तम सिमेन्टले ४० प्रतिशत (२४ लाख कित्ता) सेयर र रिलायन्सले पनि ४० प्रतिशत (सात लाख ७० हजार छ सय ४० कित्ता) सेयर बुक बिल्डिङ प्रक्रियामा जारी गर्न लागेको हो। यसमा योग्य संस्थागत लगानीकर्ताहरूले आवेदन दिनेछन्।
धितोपत्र बोर्डमा बुक बिल्डिङ प्रक्रियाकै लागि भनेर दर्ता भएका योग्य संस्थागत लगानीकर्ताहरूसँग सेयर जारी गर्ने कम्पनीले उनीहरूले चाहेको न्यूनतम संख्या, आशय मूल्य र मूल्यांकन विधि माग गर्छ।
यिनलाई छुट्याइएको पूरै सेयर बिक्री हुने गरी कम्तिमा १० योग्य संस्थागत लगानीकर्ताहरूबाट कम्पनीले आशय लिनुपर्छ। यही आधारमा उनीहरूबाट प्राप्त मूल्यअनुसार संस्थाले आधार मूल्य तय गर्छ। सो आधार मूल्यको कम्तिमा २० प्रतिशतले घटबढ हुने गरी यस्ता योग्य लगानीकर्ताहरूलाई छुट्याइएको सेयर बिक्री गर्न पाउँछन्।
पछि बोलकबोल गरेर यस्ता संस्थालाई सेयर बिक्री गरिन्छ। बोलकबोल गर्दा संस्थाहरूले तोकेको मूल्य अनुसार कम्पनीले यिनलाई छुट्याइएको सेयर सबैभन्दा बढी मूल्य हाल्नेबाट बाँड्न सुरू गरिन्छ।
यसरी बाड्दै जाँदा जुन मूल्यमा पुग्दा छुट्याइएको सेयर सकिन्छ, त्यसै मूल्यलाई कट-अफ प्राइस मान्निछ। महंगोमा सेयर मागेका योग्य संस्थागत लगानीकर्ताले पनि कट-अफ प्राइसमा सेयर पाउँछन् भने सो मूल्यभन्दा कमको बोलि लगाएकाहरूको भने हात रित्तै हुन्छ।
यसरी तय भएको कट-अफ प्राइसभन्दा १० प्रतिशत कममा कम्पनीले सर्वसाधारणलाई सेयर बिक्री गर्न पाउँछ।
