भारतका बिस्फोटक ब्याट्सम्यान युवराज सिंहले आइसिसी च्याम्पियन्स ट्रफीअन्तर्गत पाकिस्तानविरुद्ध पहिलो खेलमा उत्रिँएपछि अनौठौं कीर्तिमान बनाउने छन्। युवराज ३ वर्षपछि भारतको एकदिवसीय टोलीमा समावेश भएका छन्। च्याम्पियन्स ट्रफीका लागि सोमबार घोषणा भएको टोलीमा उनलाई पनि समावेश गरिएको थियो।
भारतले आफ्नो महत्वपूर्ण खेल ४ जुनमा पाकिस्तानविरुद्ध खेल्दैछ। भारतको समूहमा पाकिस्तानसहित दक्षिण अफ्रिका र श्रीलंका समावेश छन्। यसपालि टिम इन्डियालाई युवराजको प्रभावशाली ब्याटिङबाट ठूलो आशा छ।
युवराजले एकदिवसीय क्रिकेटको सुरुवात पनि सन् २००० मा नैरोबीमा आयोजना भएको च्याम्पियन्स ट्रफीबाट गरेका थिए। उनी त्यसपछि २००२, २००४ र २००६ मा लगातार भारतीय टोलीमो सदस्य रहे। तर, २००९ र २०१३ मा भने उनी स्थान बनाउन असफल भए।
युवराज पाँचौ पल्ट च्याम्पियन्स ट्रफीमा समावेश हुन लागेका हुन्। जुन आफैमा एउटा कीर्तिमान हो। उनले च्याम्पियन्स ट्रफीको १३ खेलको ९ इनिङमा ३३ दशमलव ८७ को औसतले २ वटा अर्धसतकको सहयोगमा २ सय ७१ रन बनाएका थिए। उनी ११ वर्षपछि च्याम्पियन्स ट्रफीमा समावेश हुन लागेका हुन्।
