नेपाल प्रहरीमा नायब निरीक्षक (सई)को रुपमा कार्यरत एक व्यक्तिले जागिर छाडेर स्थानीय तह निर्वाचनमा वडाध्यक्ष पदमा उम्मेदवारी दिएका छन्। म्याङलुङ नगरपालिका–४, पिप्लेमा जन्मिएर नेपाल प्रहरीमा जवान हुँदै नायव निरीक्षक बनेका रामबहादुर खड्काले जागिर छाडेर वडाध्यक्ष पदमा उम्मेदवारी दिएका हुन्।
खड्काले आफूले आफ्नो विचार मिल्ने भएकाले जागिर छाडेर गाउँको विकास र समृद्धिका लागि नेपाली कांग्रेसबाट वडाध्यक्ष पदमा उम्मेदवारी दिएको बताए। ‘जागिर पनि लामो समयसम्म खाएँ,’ उनले भने, ‘चुनाव आएपछि गाउँवासीले उम्मेदवारी देउ, गाउँको विकासका लागि तिम्रो आवश्यकता छ भनेपछि उम्मेदवार भएको हुँ।’
प्रहरी सेवामा रहँदा थुप्रै वर्ष उनले जिल्लामै रहेर नागरिकको सेवा गरेका छन्। ‘जनतासँग घुलमिल भएर प्रहरी सेवामै हुँदा पनि गाउँका लागि सक्ने सहयोग गरिरहेको थिएँ, अब सिङ्गो गाउँको विकासको जिम्मा लिने अवसर पनि पाएको छु,’ उनले भने। आफूले वडाध्यक्ष पदमा विजयी हासिल गरेपछि गाउँमा खानेपानी, सडक, विद्युत्, स्वास्थ्य, शिक्षा र रोजगारीका क्षेत्रमा काम गर्ने प्रतिवद्धता जनाएका छन्।
नागरिकको चाहनाअनुसार विकास र नेतृत्व आफूले गर्नसक्ने उनको तर्क छ। ‘प्रहरी सेवामा हुँदा मैले सुशासन, पारदर्शिताकै लागि काम गरेँ, भ्रष्टाचारको अन्त्य र गाउँको आर्थिक–सामाजिक विकास नै मेरा मुख्य एजेन्डा हुन्,’ उनले थपे।
प्रहरी सेवामा जवानबाट भर्ती भएका उनले हवल्दार, प्रहरी सहायक निरीक्षक (असई) र नायब निरीक्षक (सई) भएर करिब डेढ दशक काम गरिसकेका छन्। रासस
