पर्यटन प्रवद्र्धनका लागि बेल्जियमका बसहरुमा नेपालको प्राकृतिक तथा साँस्कृतिक सम्पदा झल्किने पोस्टरहरु टाँसिएका छन्।
ब्रसेल्सस्थित नेपाली राजदूतावासको सक्रियतामा विभिन्न तीस वटा सार्वजनिक स्थल तथा बसहरुमा नेपाल झल्काउने पोस्टरहरु टाँसिएका हुन्। बेल्जियमको एन्टोयर्प क्षेत्रमा गुड्ने बसमा यस्ता तस्वीरहरु देख्न सकिन्छ। यहाँको एक विज्ञापन एजेन्सी ‘एलआइजिएन डट कम’सँग नेपाली राजदूतावासले पर्यटन प्रवद्र्धनका लागि सम्झौता गरेअनुसार विभिन्न ३० वटा सार्वजनिक स्थल तथा बसमा पोष्टरहरु टाँसिएका हुन्।
यी पोस्टरहरु ३ मिटर साइजका छन्। ति पोष्टरमा ‘अ ल्याण्ड अफ नेचर, कल्चर एण्ड एडभेन्चर, ह्यभेन अन अर्थः मेक नेपाल योर नेक्स्ट होलिडे डेस्टिनेसन, वेलकम टु बर्थप्लेस अफ लोर्ड बुद्ध, एक्स्पेरियन्स नेपालः कन्ट्री अफ माउन्टेन एण्ड गड्स’ जस्ता शव्दहरु स्थानीय सर्वसाधारणले बुझ्ने भाषमा लेखिएका छन्।
यो प्रचार शैलीले नेपालको बारेमा कम्तीमा पनि सामान्य जानकारी दिने र आगामी दिनमा बेल्जियमबाट पर्यटकहरु बढ्ने अपेक्षा लिइएको बेल्जियमस्थित नेपाली राजदूत लोकबहादुर थापाले जानकारी दिए।
