दोस्रो चरणमा निर्वाचन भएका १ महानगरसहित सात उपमहानगरपालिकाको पछिल्लो मत गणनाअनुसार नेपाली कांग्रेस र एमालेले समान ३/३ मा अग्रता लिएका छन्। सुनसरीको इटहरी, रूपन्देहीको बुटवल, दाङको घोराही र तुलसीपुरमा एमालेले अग्रता लिएको छ। यस्तै विराटनगरमहानगरपालिकासहित इटहरी, र धनगढीमा कांग्रेसले अग्रता लिएको छ भने नेपालन्ज उपमहानगरपालिकामा राप्रपाले अग्रता लिएको छ।
विराटनगर महानगरपालिकाको मेयर पदमा कांग्रेसका भीम पराजुलीले ८८२ मतको अन्तर बनाएका छन्। उनले एमालेका विनोद ढकालविरुद्ध ३१४० मत प्राप्त गरेका छन्। ढकालको २२५८ मत ल्याएका छन्। यस्तै माओवादीसँग गठबन्धन गरेको संघीय फोरमका उमेश यादवले १६७५ मत ल्याएका छन्।
यस्तै उपमेयरतर्फ नेपाली कांग्रेसकै ईन्दिरा कार्कीले २३२३ मत ल्याएकी छन् भने एमालेसँग गठबन्धन गरेकी फोरम लोकतान्त्रिककी सूची चौधरीले ११८८ मत ल्याएकी छन्। फोरम नेपालसँग तालमेल गरेकी माओवादीकी नमिता न्यौपानेले १०१२ मत ल्याएकी छन्।
इटहरी उप–महानगरपालिकामा कांग्रेसका रोहित प्रसाईले अहिले १ सय ५८ मतले अग्रता लिइरहेका छन्। भने उप मेयरमा २ सय ३८ मतले पछि एमाले रहेको छ। अहिलेसम्म सार्वजनिक भएको पछिल्लो मत परिणाम अनुसार कांग्रेसका प्रसाईले ४६७५ मत ल्याएका छन् भने एमालेका द्वारिकालाल चौधरीले ४५१८ मत ल्याएका छन्।
धरान उप–महानगरपालिकामा नेकपा एमालेका तारा सुब्बाले मेयर पदमा नेपाली कांग्रेसका तिलक राईलाई २ सय ३७ मतले उछिनेका छन्।
पछिल्लो मतगणनाअनुसार एमालेका सुब्बाले २ हजार ९ सय ३२ मत प्राप्त गरेका छन्। कांग्रेसका उम्मेदवार राईको मत २ हजार ६ सय ९५ रहेको छ। यस निर्वाचन क्षेत्रमा माओवादीका आइन्द्र विक्रम बेघाले १ हजार ६ सय ४८ मत प्राप्त गरेका छन्।
उपमेयरमा एमालेकी मञ्जु भण्डारी सुवेदीले ३ हजार ४४ मत प्राप्त गरेकी छिन्। कांग्रेसकी श्यामा रेग्मीको २ हजार ६ सय ८३ मत रहेको छ। संघीय समाजवादी फोरम नेपालका पारस काङमाङ राईले उपमेयरमा ९ सय ३५ मत प्राप्त गरेका छन्।एमालेले रुपन्देहीको बुटवल उपमहानगर तथा दाङको घोराही र तुलसीपुर उपमहानगरपालिकाका ३ स्थानमा आफ्नो अग्रता कायमै राखेको छ।
पछिल्लो मतपरिणामअनुसार, बुटवलमा एमालेका उम्मेदवार शिवराज सुवेदीले ६२८९ मत ल्याएका छन्। माओवादी केन्द्रसँग मिलेर उम्मेदवार बनेका कांग्रेसका खेलराज पाण्डेयले ६०६३ मत ल्याएर कडा टक्कर दिएका छन्। यस्तै उपमेयरमा एमालेकै गोमा आचार्यले ६९३६ मत ल्याएर अग्रता कायमै राखेकी छन् भने संयुक्त उम्मेद्वार बनेका माओवादी केन्द्रका जगतबहादुर पोखरेलले ४३३२ मत ल्याएका छन्।
दाङको तुलसीपुर उपमहानगरपालिकामा एमालेबाट प्रमुखमा घनश्याम पाण्डेयले ५४१३ र उपप्रमुखमा माया शर्माले ४६६४ मत पाएका छन् । नेपाली कांग्रेसबाट प्रमुखमा गेहेन्द्र गिरीले ४०७६ र उपप्रमुखमा देविका नेपाली घिमिरेले ४२२२ मत ल्याएका छन्। माओवादी केन्द्रबाट प्रमुखमा शेषुराम भण्डारीले १३७० र उपप्रमुखकी उम्मेद्वारले १३३७ मत ल्याएका छन्।
घोराही उपमहानगरपालिकामा एमालेका नरुलाल चौधरीले ९९६१ र उपप्रमुखमा सीता सिग्देल न्यौपानेले ९४१९ मत ल्याएका छन्। कांग्रेसका प्रमुख भुपबहादुर डाँगीले ७३९७ र उपप्रमुखमा पुष्पा श्रेष्ठले ७३३४ मत ल्याएका छन्। माओवादीका जीवन गौतमले ५३८८ ल्याएका छन् भने उपप्रमुखमा माओवादीले ५५७७ मत ल्याएको छ।
धनगढी उपमहानगरपालिकामा नेपाली कांग्रेसका नृप वडले २९८६ मत ल्याएका छन्। स्वतन्त्र उम्मेदवार गोपाल हमालले २३४९ मत ल्याएका छन्। त्यस्तै नेकपा एमालेका दुर्गाप्रसाद जोशीले २३२३ मत ल्याएर पछ्याइरहेका छन्।
नेपालगन्ज उपमहानगरपालिकामा राप्रापाले अग्रता बढाएको छ। राप्रपाका धवलशम्शेर राणाले ५०३८ मत ल्याएका छन्। कांग्रेसका सुरेश कुमार कनौडियाले २९६४ मत ल्याएका छन् भने तेस्रो स्थानमा रहेको माओवादी केन्द्रका उम्मेद्वार दामोदर आचार्यले २५६० मत पाएका छन्।
उप प्रमुखमा नेपाली काग्रेसकी उमा थापामगरले अग्रता कायम राखेकी छन्। उनले ३८५८ मत पाएकी छन् भने राप्रपाकी रमारानी गुप्ताले ३८०४ मत ल्याएकी छन्।
