बेतिनी सिमसार व्यवस्थापन समितिका संयोजक कृष्णप्रसाद दाहालका अनुसार सिमसारमा अवस्थित पोखरीमा ती डुंगा सञ्चालनमा ल्याइएको हो । उर्लाबारी नगरपालिकाले सिमसारको विकासका लागि नगरपालिकाले बजेट छुट्याउने भएपछि सिमसार विकासको काम अगाडि बढाइएको हो ।
बेतिनी सिमसारले आन्तरिक तथा बाह्य पर्यटन प्रवर्द्धन गर्नुका साथै जैविक विविधता संरक्षणमा पनि ठूलो भूमिका खेल्ने उर्लाबारी नगरपालिकाका प्रमुख खड्ग फागोको भनाइ छ । उनले भने– ‘पर्यटन प्रवर्द्धन गरेर यो ठाउँको विकासमा सिमसारले महत्वपूर्ण सहयोग गर्छ ।
सिमसारमा राखिएका ती दुईवटा डुंगा एक लाख ९० हजार रुपैयाँ खर्चिएर ल्याइएको हो । डुंगा चढेबापत प्रतिव्यक्ति ५० रुपैयाँ लिने सिमसार व्यवस्थापन समितिले बताएको छ ।
उक्त सिमसार परिसरमा बाल उद्यान निर्माणको कामसमेत भइरहेको सिमसार व्यवस्थापन समितिका सचिव गोपाल खरेलले बताए ।सिमसारको शहर भनेर घोषणा गरिएको उर्लाबारीमा बेतिनी, लामपाते, बुढाठाकुर सिमसारलगायत अन्य सिमसार क्षेत्र पर्छन् । रासस
