प्रतिपक्षी दलहरूले प्रतिनिधिसभाको अवरोध हटाउने भएका छन्।
संसदमा उत्पन्न गतिरोध अन्त्यका विषयमा छलफलका लागि विशेष समिति गठन गर्ने सहमतिपछि प्रतिपक्षी दलहरू अवरोध खुलाउन तयार भएका हुन्।
प्रतिपक्षी दलहरूले सर्लाहीका दुई घटनामा प्रहरीले गोली चलाएको विषयमा संसदीय छानबिन माग गर्दै आएका थिए। तर सत्तारूढ दलहरूले संसदीय छानबिन समितिलाई अस्वीकार गर्दै आएका थिए।
सभामुख कृष्णबहादुर महराले अवरोध हटाउने विषयमा संघीय संसद सचिवालयमा बैठक डाकेका थिए।
बैठकमा आगामी दिनमा गतिरोध हुन नदिने विषयमा ७ सदस्यीय विशेष समिति गठनको सहमति भएको हो।
समितिको नेतृत्व नेकपा संसदीय दलका उपनेता सुवास नेम्वाङले गर्ने तय भएको छ।
राजपाका सांसद राजकिशोर यादवले गतिरोध खुलाउने विषयमा मध्यमार्गी बाटो निकालिएको बताए।
'यो विशेष समितिमा चारै दलका सदस्य रहन्छन्', यादवले भने, 'यसले लाल आयोगको प्रतिवेदेन सार्वजनिक गर्ने विषय तथा अन्य विषयमा सरकारलाई ध्यानाकर्षण गराउने काम गर्छ।’
यसअघि आजै ११ बजेका लागि डाकिएको बैठक सर्वदलीय बैठकका कारण १ बजेसम्मका लागि सारिएको थियो।