रोल्पाको थवाङ गाउँपालिका -१ मा नेत्रविक्रम चन्द ‘विप्लव’ नेतृत्वका पार्टीका एक नेताले उम्मेदवारी दर्ता गराएका छन्।
थवाङ वडा नम्बर १ मा रिक्त अध्यक्ष पदका लागि मंसिर १४ गते उपनिर्वाचन हुँदैछ। उपनिर्वाचनका लागि बुधबार निर्वाचन अधिकृत कार्यालय पुगेर भद्रकुमार झाँक्रीले उम्मेदवारी दर्ता गराएका हुन्।
अध्यक्षमा उम्मेदवारी दिन वडा नम्बर १ का निर्वाचित सदस्यसमेत रहेका झाँक्रीले मंगलबार गाउँपालिका अध्यक्ष बीरबहादुर घर्ती मगरलाई राजीनामा दिएका थिए।
‘हिजो राजीनामा दिएर उहाँ आज उम्मेदवारी दिन योग्य हुनुभएको हो। उहाँको राजीनामा हिजै स्वीकृत भयो,’ अध्यक्ष मगरले सेतोपाटीसँग भने।
२०७४ सालमा भएको स्थानीय तह निर्वाचनमा वडाध्यक्ष फर्कबहादुर बुढासहित सबै प्यानल स्वतन्त्र उम्मेदवारले जितेका थिए।
निर्वाचन आयोगमा पार्टी दर्ता नभएकोले त्यसबेला विप्लव पार्टीले चुनावमा भाग लिन मिल्दैनथ्यो। सोही कारण उनीहरूले कांग्रेससँग तालमेल गरी स्वतन्त्र रूपमा उम्मेदवारी दिएका थिए।
वडाध्यक्षका लागि बुधबार सत्तारूढ नेपाल कम्युनिष्ट पार्टी नेकपाबाट जनककुमार बुढा, नेपाली कांग्रेसबाट कमल रोका र स्वतन्त्रबाट विप्लवका झाँक्रीले उम्मेदवारी दर्ता गराएका हुन्।
सरकारले विप्लव नेतृत्वको पार्टीलाई गत फागुनदेखि प्रतिबन्ध लगाएको छ। उक्त पार्टी निर्वाचन आयोगमा दर्ता पनि छैन। ‘पार्टीबाट उम्मेदवारी दिन नमिल्ने भएपछि झाँक्रीले स्वतन्त्र उम्मेदवारी दिएका हुन्,’ स्रोतले भन्यो, ‘यहाँ विप्लवकै पार्टीको बाहुल्यता छ।’
गाउँपालिका अध्यक्ष मगरले भने चुनाव कसले जित्छ अहिल्यै अनुमान गर्न नसकिने बताए।
‘कसले जित्छ अहिले भन्न सकिन्न,’ उनले भने, ‘सहमतिको प्रयास भइराखेको छ। सहमति भएन भने चुनावबाट नै नेतृत्व चयन हुन्छ।’
