प्रमुख प्रतिपक्षी नेपाली कांग्रेसका सभापति शेरबहादुर देउवाले सभामुख चयन प्रक्रिया छिटो सुरू गर्नुपर्ने बताएका छन्।
हिउँदे अधिवेशन आह्वान भएको महिनादिनसम्म पनि सत्तारूढ नेपाल कम्युनिष्ट पार्टीले सभामुखको उम्मेदवार दिन नसकेको उल्लेख गरेका देउवाले अब धेरै कुर्न नसकिने पनि बताए।
‘नेकपाले संसद बन्धक बनाउन मिल्दैन। उहाँहरू मिल्दै नमिल्ने हो भने हामी संसद चलाइदिन्छौं,’ बुधबार मोरङमा पत्रकारहरूसँग देउवाले भने।
नेकपाभित्र आन्तरिक विवादका कारण सभामुख चयन प्रक्रिया लम्बिएको छ।
पुस ४ गतेपछि तीन पटक सूचना टाँसेर संसद बैठक स्थगित गरिएको छ।
अर्को बैठक माघ ६ गते दिउँसो १ बजे संसद बैठक डाकिएको छ।
देउवाले पार्टीभित्रका विवाद मत्थर हुँदै गइरहेको पनि दाबी गरे।
बरिष्ठ नेता पौडेल र पूर्वमहामन्त्री कृष्णप्रसाद सिटौलासँग आफूले कुराकानी गरिसकेको उल्लेख गर्दै देउवाले तोकिएकै समयमा १४ औं महाधिवेशन हुने बताए।
महाधिवेशन ०७७ फागुन ७ देखि १० सम्म काठमाडौंमा गर्ने निर्णय कांग्रेसले गरेपछि आफूहरूको परामर्शबिना नै सभापति अघि बढेकोमा पौडेल र सिटौला रूष्ट थिए।
‘असन्तुष्ट समूहसँग कुरा मिलिसक्यो। तोकिएकै समयमा महाधिवेशन हुन्छ,’ सभापति देउवाले भने।
