उपसभामुख शिवमाया तुम्बाहाङ्फेले राजीनामा दिएसँगै पत्रकार सम्मेलन गर्ने भएकी छन्।
तुम्बाहाङ्फेले आजको संसद बैठक सकिएलगत्तै बानेश्वरमा आफ्ना धारणा राख्न पत्रकार सम्मेलन गर्न लागेको संसद सचिवालयका प्रेस विज्ञ शेखर अधिकारीले सेतोपाटीलाई बताए।
बलात्कार अभियोगमा तत्कालीन सभामुख कृष्णबहादुर महराले गत असोजमा राजिनामा दिएपछि प्रतिनिधि सभाको सभामुख पद रिक्त थियो।
त्यतिबेलैदेखि शिवमायाले सभामुखको दाबी गर्दै आएकी थिइन्। महराले गरेको गल्तीमा आफू सति जान नसक्ने भन्दै उपसभामुखबाट राजीनामा नदिने अडानसमेत उनले राखेकी थिइन्।
पुस २६ गते बसेको नेकपा सचिवालय बैठकले उपसभामुखलाई राजीनामा गर्न भनेको थियो। तुम्बाहाङ्फेले सभामुखको उम्मेदवार तय नगरेसम्म राजीनामा नदिने बताएकी थिइन्।
उनले आफूलाई सभामुख बनाउन नहुने कारणसमेत नेकपाका दुई अध्यक्षसँग मागेकी थिइन्।
आइतबार बसेको नेकपा सचिवालय बैठकले सभामुखकको उम्मेदवार तय गरेपछि तुम्बाहाङ्फेले राजीनामा दिन लागेकी हुन्।