सेक्युरिटी प्रिन्टिङ प्रेस खरिद प्रकरणको विषयमा विजयप्रकाश मिश्रविरूद्ध संघीय संसदको सार्वजनिक लेखा समितिले प्रहरी प्रधान कार्यालयमा उजुरी गरेको छ।
गत बिहीबार पूर्वसञ्चारमन्त्री गोकुल बाँस्कोटासँगको कुराकानी मिश्रले सार्वजनिक गरिदिएका थिए। तर लेखा समितिले भने अडिओ विषयमाभन्दा पनि सांसदको मानहानी गर्ने गरी सञ्चार माध्यममा टिप्पणी गरेकोमा प्रहरीमा उजुरी गरेको हो।
उनले आफूले अडिओ लिक नगरेको भए लेखा समितिले जर्मन कम्पनीलाई सेक्युरिटी प्रेस खरिदका लागि निर्देशन दिन लागेको बताएका थिए।
समितिले यसअघि प्रहरीको साइबर ब्यूरोलाई पत्र काटेको थियो। तर ब्यूरोले प्रहरी प्रधान कार्यालयलाई पत्राचार गर्न सुझाएको थियो। लेखा समितिले मिश्र र सांसदहरूका विषयमा टिप्पणी गरेका अर्का एक व्यक्तिलाई छानबिन गरी कारबाही गर्न पत्राचार गरेको हो।
'प्रहरी प्रधान कार्यालयमा विजयप्रकाश मिश्रविरूद्ध कार्बाही हुनुपर्ने भन्दै एउटा पत्र प्राप्त भएको छ,'प्रहरी प्रधान कार्यालयका डिआइजी शैलेश थापा क्षेत्रीले सेतोपाटीसँग भने ,'साइबर क्राइममा अनुसन्धान गरिदिन पर्यो भनेर आएको हो।'
उनले उक्त पत्र सम्बन्धित निकायमा बुझाउने बताए।
'अब योसम्बन्धी कुन चाहिँ कार्यालयले अनुसन्धान गर्ने हो त्यस कार्यालयमा जान्छ,'डिआइजी थापाले भने।
उनीहरूबीचको अडिओ सार्वजनिक भएपछि मन्त्री बाँस्कोटाले राजीनामा दिएका थिए।