कोरोना भाइरसका कारण विश्वनै त्रसित भएको बेलामा सामान्य रूघाखोकी समेतको उपचारमा नगर्ने चिकित्सक तथा अस्पतालहरूलाई प्रदेश -२ सरकारले कारबाही गर्ने भएको छ।
कोरोना संक्रमण नियन्त्रणका लागि प्रदेशमा भए/गरेका कामबारे जानकारी लिन तथा आवश्यक निर्देशन दिनका लागि मंगलबार बोलाइएको बैठकमा मुख्यमन्त्री राउतले सामान्य रूघाखोकीका बिरामीको उपचार नगर्ने चिकित्सक तथा अस्पताललाई कारबाही गर्ने चेतावनी दिएका हुन्।
उनले चिकित्सक तथा अस्पतालहरूले उपचारमा हेलचक्र्याइँ गरिरहेको गुनासो आएको भन्दै मुख्यमन्त्री राउतले त्यस्ता अस्पताल र चिकित्सकहरूलाई सूची तयार गरी प्रदेश सरकारमा पठाउन प्रमुख जिल्ला अधिकारीहरूलाई निर्देशन दिए।
उनले भने,‘राज्यको सुविधा प्रयोग गरे पनि संकटको बेलामा बदमासी गर्ने जो कोहीलाई पनि कारबाही गर्छौ, तपाईंहरू सिफारिस गर्नु लाइन्सेन्स खारेजीसम्मको कारबाही हुन्छ।’
मुख्यमन्त्री लालबाबु राउतले कोरोना संक्रमण नियन्त्रणको लागि जस्तो सुकै कदम चाल्न सुरक्षा अधिकारीहरूलाई निर्देशन दिएका छन्।
बैठकमा सुरक्षा निकायका प्रमुखहरुले राखेका जिज्ञासामा भौतिक पूर्वाधार मन्त्री जितेन्द्र सोनल, आन्तरिक मामिला तथा कानून मन्त्री ज्ञानेन्द्र कुमार यादव र उद्योग, पर्यटन तथा वन मन्त्री राम नरेश रायले सम्बन्धित विषयहरुमा आ–आफनो धारणा राख्नु भएको थियो भने मुख्य न्यायाधिवक्ता दिपेन्द्र झाले अहिले विषेश परिस्थितमा गर्नु पर्ने काम र कानूनी अवस्थावारे आफ्नो धारणा राखेका थिए ।
बैठकमा चार वटै सुरक्षा निकायका प्रदेश प्रमुख, आठै जिल्लाका प्रमुख जिल्ला अधिकारी, नेपाल प्रहरी, सशस्त्र प्रहरी र अनुसन्धानका प्रहरी उपरीक्षकसहितको उपस्थिति रहेको थियो।