सुदूरपश्चिममा विदेशबाट आएकाहरूलाई २१ दिनसम्म क्वारेन्टाइनमा बस्न मुख्यमन्त्रीले आग्रह गरेका छन्।
आइतबार मुख्यमन्त्री त्रिलोचन भट्टले प्रदेशवासीका नाममा सम्बोधन गर्दै बाहिरी मुलुकबाट आएका नेपालीहरू २१ दिनसम्म अनिवार्य रूपमा क्वारेन्टाइनमा बस्न आग्रह गरेका हुन्।
'बाहिरी मुलुकबाट प्रदेशभित्र आउनुभएका दाजुभाइ तथा दिदी बहिनीहरूलाई आफ्नो नातेदार तथा नजिकका अरू व्यक्तिहरूको स्वास्थ्य सुरक्षालाई ध्यानमा राखी २१ दिनसम्म अनिवार्य रूपमा क्वारन्टाइनमा रहन अपिल गर्दछु,'मुख्यमन्त्री भट्टले भने।
साथै, ती व्यक्तिको सम्पर्कमा आएकाहरूले नजिकको स्वास्थ्य संस्थामा गई जाँच गराउन समेत उनले आग्रह गरेका छन्।
उनले संक्रमितको आशंका भएमा पनि जाँच गराउन अनुरोध गरेका छन्। हालसम्म नेपालमा कोरोनाभाइरस संक्रमितको संख्या नौ पुगिसकेको छ। तीमध्ये एकको उपचार भइसकेको छ भने अन्यको उपचार भइरहेको छ।
ती आठ जनामध्ये पनि चार जना सुदूरपश्चिममा रहेका छन्। उनीहरूको उपचार सेती प्रादेशिक अस्पताल धनगढीमा उपचार भइरहेको छ।