जनता समाजवादी पार्टीको विवादमा निर्वाचन आयोगले हेडकाउन्ट गरेको छ।
कसको पक्षमा बहुमत छ भनेर जाँच्न सोमबार आयोगले जसपाको कार्यकारिणी समितिका ५१ जनालाई हस्ताक्षर सनाखत गर्न बोलाएको थियो।
अहिलेसम्म ५० जनाले हस्ताक्षर सनाखत गरेका छन्। तीमध्ये अध्यक्ष महन्थ ठाकुर र राजेन्द्र महतोको पक्षमा १६ र उपेन्द्र यादव र बाबुराम भट्टराई पक्षमा ३४ जनाले हस्ताक्षर सनाखत गरेका छन्।
जेलमा रहेका कार्यकारिणी सदस्य रेशम चौधरीले जेलबाटै हस्ताक्षर सनाखत गर्ने कि आयोगमै उपस्थित गराउनेबारे छलफल भइरहेको छ।
कार्यकारिणी सदस्यको हस्ताक्षर सनाखतपछि यादव र भट्टराई पक्षका नाममा पार्टी आउने निश्चितजस्तै भइसकेको छ।
यसअघि ठाकुर र महतोको पक्षमा रहेका राजकिशोर यादव र मनिष सुमन पनि यादवको पक्षमा लागेका छन्।
उनीहरूमध्ये राजकिशोर केपी शर्मा ओली मन्त्रिपरिषदमा मन्त्री थिए।
मधेसी जनाधिकार फोरमबाट राजनीति सुरू गरेका राजकिशोरले केही समयपछि फोरम (गणतान्त्रिक) खोलेका थिए। विभिन्न ६ दल मिलेर राजपा बन्दा उनले आफ्नो पार्टी पनि त्यसैमा मिसाएका थिए। पछि राजपा र समाजवादी पार्टी मिलेर जसपा बनेको थियो।
तत्कालीन प्रधानमन्त्री केपी शर्मा ओलीले दोस्रो पटक प्रतिनिधि सभा विघटन गरेपछि उनको त्यो कदमबारे जसपामा विवाद चर्किएको थियो। यादव र बाबुराम भट्टराई पक्षले त्यसलाई प्रतिगमन भनेर विरोध गरेका थिए भने ठाकुर र महतो पक्षले त्यसको समर्थन गर्दै सरकारमा सहभागी भएका थिए।
पहिलो पटक ओलीले ठाकुर-महतोका १० जनालाई मन्त्री बनाउँदासम्म राजकिशोर परेका थिएनन्। अर्को पटक मन्त्रिमण्डल विस्तार गर्दा ओलीले उनलाई मन्त्री बनाएका थिए। ओलीसँग राजकिशोरको व्यक्तिगत निकटता थियो।
ओली सरकारमा मन्त्री बनेका उनी अहिले यादव-भट्टराई पक्षमा लागेका हुन्।
आज यादव-भट्टराई पक्षमा हस्ताक्षर सनाखत गरेका मनिष सुमन नेता राजेन्द्र महतोसँग लामो समय निकट रहेका नेता हुन्। सप्तरीबाट प्रदेश २ सभा सदस्य रहेका सुमन महतोको तत्कालीन सद्भावना पार्टीमा महासचिव थिए।
जसपामा विवाद चुलिँदै गएपछि भने उनी महतोका पक्षमा खुलेर लागेका थिएनन् बरू तटस्थ बसेका थिए।
आज उनले पनि यादव र भट्टराई पक्षमा आफूलाई उभ्याएका हुन्।
