सरकारले कोरोना रोकथाम तथा नियन्त्रण गर्न एक सय दिनको योजना बनाउने तयारी गरेको छ।
आज गृह मन्त्रालयमा गृहमन्त्री बालकृष्ण खाण र स्वास्थ्य तथा जनसंख्या राज्यमन्त्री उमेश श्रेष्ठ उपस्थित बैठकमा यसबारे कुराकानी भएको छ।
आज गृह मन्त्रालयमा कोरोना रोकथाम तथा नियन्त्रण केन्द्रित रहेर बैठक बसेको थियो।
बैठकमा गृह सचिव महेश्वर न्यौपाने, प्रहरी महानिरीक्षक शैलेश थापा क्षेत्री,सशस्त्र प्रहरी महानिरीक्षक शैलेन्द्र खनाल, राष्ट्रिय अनुसन्धान विभागका प्रमुख गणेशप्रसाद अधिकारी लगायतको सहभागी रहेको थियो।
गृहमन्त्री खाणले बैठकमा कोरोना नियन्त्रण चुनौतिपूर्ण रहेकोले सबैको सहकार्य र समन्वय आवश्यक रहेको बताएका थिए।
उनले कोरोना नियन्त्रण गर्न राज्यको मुख्य दायित्व रहेको भन्दै राज्यका सबै संयन्त्रहरू सक्रिय हुनुपर्नेमा जोड दिएका थिए।
कोरोना नियन्त्रणमा स्वास्थ्य मन्त्रालयले गृह मन्त्रालयसँग समन्वय गर्नुपर्ने आवश्यकता पनि उनले औंल्याए भने गृहले आवश्यक व्यवस्थापनको पाटोमा सहजीकरण गर्ने बताएका थिए।
कोरोनाको तेस्रो लहर आउनुअघि नै तयारी अवस्थामा रहनुपर्ने गृहमन्त्री खाणको भनाइ थियो। त्यसका लागि होल्डिङ सेन्टर निर्माण गर्नुपर्ने उनले बताए।
सीमा क्षेत्रमा पनि छिटो कोरोना खोप लगाउने व्यवस्था मिलाउन उनले स्वास्थ्य राज्यमन्त्रीलाई आग्रह गरेका थिए। खोप केन्द्रमा भिडभाड देखिएकोले व्यवस्थित गर्न पनि उनको आग्रह छ।
साथै स्वास्थ्य राज्यमन्त्री उमेश श्रेष्ठले गृह प्रशासनको सहयोगको अपेक्षा गरेका थिए। सरकारी अस्पतालमा थप अक्सिजन प्लान्टको व्यवस्थापन मिलाउने तयारी रहेको उनको भनाइ छ।
उनले खोप केन्द्रहरू थप व्यवस्थित बनाउनुपर्ने पनि बताए। निजी मेडिकल कलेज र अस्पतालहरूसँग पनि समन्वय गरिनुपर्ने उनको भनाइ छ।