पूर्वअर्थमन्त्री तथा नेकपा (एमाले) का सांसद सुरेन्द्र प्रसाद पाण्डेले कर्मचारीको तलव १५ प्रतिशतका दरले समान रुपमा बढ्नु न्यायोचित नभएको बताएका छन्।
बुधबारको प्रतिनिधि सभा बैठकमा बोल्दै सांसद पाण्डेले महंगीको हिसाबमा कर्मचारीको तलव १५ प्रतिशतले वृद्धि हुने ठिकै भए पनि सबै वर्गका कर्मचारीहरुको समान रूपमा तलव वृद्धि हुनु न्यायोचित नभएको बताए। उनले यसरी समान रुपमा तलव वृद्धि गर्नु समाजवादउन्मुख हुनु हो भन्ने प्रश्न समेत गरे।
‘तलव बढायौं १५ प्रतिशत। ठिकै होला कर्मचारीको महंगीको हिसाबले। तर बिगतमा भन्दा हामीले के कुरा ख्याल गरेनौँ भने फ्ल्याट रेटमा १५ प्रतिशत बढाउँदा तल्लो वर्गका कर्मचारीहरु र माथिल्लोले एउटै दरमा प्राप्त गर्दा यो न्यायोचित भयो त?’, उनले प्रश्न गरे, ‘यो समाजवादउन्मुख भयो? विगतमा यस ढंगले हामीले गर्ने गर्दथ्यौँ ? कहीँ पनि म त्यो देख्दिनँ। यो न्यायोचित वितरण त भएन होला। बजेटका उद्देश्यमाथि नै यत्रो धेरै व्याख्या गर्दाखेरीमा पनि यो चिजप्रति कतैपनि मेरो त्यहाँ सहमती हुन सकेन । मेरो मनले मानेन।’
सांसद पाण्डेले वृद्धभत्ता ६८ वर्षमै दिए पनि एमालेले स्याबासी पाउने बताए। उनले वृद्धभत्ता एमालेको ब्राण्ड भएकाले जसले जति वर्षमा झारेर दिएपनि केही फरक नपर्ने बताए। उनले वृद्धभत्ता ५ हजार पुर्याएको भए पनि राम्रो हुने तर्क गरे। ‘वृद्धभत्तालाई ६८ वर्ष झार्यौं नि। वृद्धभत्ता जतिसुकै कुरा गरे पनि यो एमालेको ब्राण्ड जस्तो हुन्छ। तपाई ६८ मा झार्नुस्, ५८ मा झार्नुस् केही फरक पर्दैन। वृद्धभत्ता जे गर्नुस् त्यो एमालेकै दाबी हुन्छ’, उनले भने, ‘एमालेलाई नै मान्छेले स्याबास् गर्छन्। ताली ठोक्छन्। तर तपाईँ आफैंले पनि ५ हजार पुर्याउँछु भनेर हिजो घोषणापत्रमा बोलेको होइन र? पाँच पुर्याएको भए त अझ राम्रो हुन्थ्यो नि। किन गर्नुभएन? त्यसमा बरू गुनासो छ।’
उनले नेपाली कांग्रेसले एकलौटी शासनको सपना देखिरहेको टिप्पणी गरे। गठबन्धनलाई सँगै जान गाह्रो भइराखेको उल्लेख गर्दै उनले चुनाव भएदेखि गठबन्धनका दलहरू सबै छुट्टीने थिए भन्ने कांग्रेसले चाहेको जिकिर गरे।
‘गठबन्धन सँगसँगै जानलाई गाह्रो भएको छ। कांग्रेसलाई छिटोभन्दा छिटो झुण्डिएका सबै गलगाड यहाँबाट कहिले यसको पिण्ड चुडाउने भन्ने छ। चुनाव भएदेखि यसको गलगाड छुट्थ्यो कि भन्ने छ’, उनले भने, ‘सतिदेवीको अंगपतन भएको जस्तो। चुनावपछि यी सबै कसले हात समातेको छ। कसले खुट्टा समातेको छ। ती सबै त्यहाँबाट छुट्टीएर जाने छन्। कांग्रेस एकलौटी शासनको बडो सपनामा बसिरहेको छ। त्यसकै लागि प्रयास गरिरहेको मैले देख्छु।’
सांसद पाण्डेले ६० लाख परिवारलाई इन्डक्श चुल्हो दिने कुरामा अनुचित लाभ लिने स्वार्थ लुकेको बताए। उनले चुनावी फण्ड उठाउनका लागि इन्डक्शन चुल्हो वितरणको खेलोमेलो गरिएको हो कि भन्ने आशंका व्यक्त गरे।
‘६० लाख परिवारलाई तपाईँले इन्डस्कन चुल्हो बाँड्ने कुरा गर्नुभएको छ। ३४ सय देखि १२ हजार रूपैयाँ पर्ने इन्डक्सन चुल्होको न्युनतम बेशमा राखेर ५ हजारमा किन्नुभयो भने पनि ३० अर्ब रूपैयाँ पर्ने रहेछ। यो कतै चुनावमा फन्ड उठाउने खेलोमेलो त होइन?’, उनले प्रश्न गरे, ‘तपाईँसँग पुर्वाधार छैन अनि इन्डक्शन चुल्हो बाड्ने कुरा गर्नुहुन्छ। पहिला एकचोटी यो सिएफएल वल्वको पनि यस्तै चर्चा भएको थियो पछि रोकियो। यसैमा खरिद गर्ने र अनुचित लाभ लिने खालको कतै कुरा त होइन?’
उनले शिक्षा र स्वास्थ्यको क्षेत्रमा बजेट कटौती भएकोप्रति असन्तुष्टि व्यक्त गरे।