सत्ता गठबन्धनको आजको बैठकमा गभर्नर महाप्रसाद अधिकारीबारे कुरा उठेको छ।
अधिकारीको नाम नेकपा एमालेको अर्थ तथा योजना विभागमा रहेको आरोप छ। एमालेले भने उक्त नाम गभर्नरको नभएको दाबी गर्दै आएको छ।
शुक्रबार बसेको सत्ता गठबन्धन बैठकमा नेकपा (माओवादी केन्द्र) का नेता नारायणकाजी श्रेष्ठले गभर्नर अधिकारबारे कुरा उठाएका हुन्। गभर्नर भएर कुनै पार्टीमा संलग्न र सक्रिय रहनु राम्रो नभएको श्रेष्ठको भनाइ थियो।
यसबारे आफूले पनि गम्भीर रूपमा लिएको प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले बताएका थिए।
बैठकमा सहभागी कांग्रेस प्रवक्ता प्रकाशशरण महतले छलफलको एजेन्डा नभए पनि गभर्नरबारे पनि केही कुरा उठेको बताए।
माओवादीले भने एमालेले अर्थ तथा योजना विभागमा राखेको एम अधिकारी महाप्रसाद अधिकारी भएकोले गभर्नरबाट राजीनामा दिनुपर्ने माग गर्दै आएको छ।