प्रमुख प्रतिपक्षी नेकपा एमालेका सांसद प्रदीप ज्ञवालीले चुनाव घोषणापछि सरकार कामचलाउ भएको भन्दै सदनलाई बिजनेश दिन नमिल्ने तर्क गरेका छन्।
प्रतिनिधि सभा र प्रदेश सभा सदस्य निर्वाचन मंसिर ४ मा गर्ने सरकारले घोषणा गरेको थियो।
आज प्रतिनिधि सभा बैठकमा बोल्दै ज्ञवालीले कामचलाउ सरकारले सदनलाई बिजनेश दिन मिल्छ? भन्दै प्रश्न गरेका हुन्।
‘निर्वाचन मिति घोषणा गरेपछि सरकार कामचलाउमा रूपान्तरित भयो। तर हामी सदन चलाइरहेका छौं,’ उनले भने, ‘कामचलाउ सरकारले सदनलाई बिजनेश दिन मिल्छ र सभामुख महोदय?’
सरकारले विजनेश दिने र विधेयक दर्ता तथा त्यसमा छलफल गर्ने स्थिति देखिएको उनले बताए।
‘महाअभियोग कार्यसूची देखेँ। प्रधानन्यायाधीशविरूद्ध फागुन २९ मा महाअभियोग दर्ता भएको थियो। यतिन्जेल यो सरकार सुतेर बस्यो,’ उनले भने, ‘राजनीतिक प्रतिशोध साँध्न खोजियो। यो उचित भएन।’
उनले चुनाव घोषणापछि सरकारले नियमित सरकारजस्तो गरी सदनलाई बिजनेश दिन नहुने पनि बताए।