सरकारले मंसिर ४ गते आम निर्वाचन गर्ने निर्णय गरेसँगै विभिन्न राजनीतिक दलका नेताहरूले आफू कुन क्षेत्रमा चुनाव लड्ने हो भन्ने तयारी गर्न थालेका छन्।
सत्तारूढ गठबन्धनका रूपमा रहेका पाँच दलले चुनावी तालमेल गर्ने निर्णय गरेकाले कुन क्षेत्रमा कुन पार्टीका नेताले टिकट पाउँछन् भन्ने टुंगिन बाँकी छ।
नेकपा (एकीकृत समाजवादी) की सचिव एवं पूर्वमन्त्री रामकुमारी झाक्रीले पनि यसपालि प्रत्यक्षतर्फ चुनाव लड्ने तयारी गरेकी छन्।
२०७४ को चुनावमा नेकपा (एमाले) बाट समानुपातिक सांसद बनेकी झाक्री गुल्मीकी हुन्। यसपालिको चुनावमा भने उनले काठमाडौं-२ बाट उठ्ने विकल्प पनि खुला राखेकी छन्।
सेतोपाटीसँग कुराकानी गर्दै झाक्रीले गुल्मी-२ वा काठमाडौंबाट चुनाव लड्ने बताइन्।
यो पनि पढ्नुस्:
‘यो पटकको निर्वाचनमा मेरो नाम समानुपातिक सूचीमा समावेश हुने छैन। म प्रत्यक्ष नै उठ्ने हो। मैले काम गरेको इलाका वा अपनत्व भएको ठाउँ र मेरा अभिभावक भएको स्थान गुल्मी क्षेत्र नम्बर २ हो। त्यहाँबाट चुनाव लड्नुपर्छ भन्ने दबाब ममाथि छ,’ झाक्रीले भनिन्,‘काठमाडौंबाट पनि कुरा भइरहेको छ। मेरा लागि प्राथमिकता गुल्मी नै हो। अर्को विकल्प भनेको काठमाडौं हो।’
झाक्री काठमाडौंमा उठ्ने भइन् भने उनका लागि सबैभन्दा उपयुक्त क्षेत्र काठमाडौं- २ हो।
एकीकृत समाजवादीका अध्यक्ष माधवकुमार नेपालले यो क्षेत्रबाट २०७० र २०७४ मा चुनाव जितेका छन्। २०७४ को चुनावमा वाम गठबन्धनका तर्फबाट उम्मेदवार बनेका नेपालले २७ हजार ३ सय ६६ मत पाएका थिए। कांग्रेसका दीपक कुइँकेलले १४ हजार ९ सय ३ मत ल्याएका थिए।
यसपालि माधव नेपाल काठमाडौं-२ बाट उठ्ने /नउठ्ने टुंगो छैन। उनी गृह जिल्ला रौतहटबाट उठ्ने धेरै सम्भावना छ। रौतहटमा उनको निर्वाचन क्षेत्रमा एकीकृत समाजवादीले सबैभन्दा धैरै मत ल्याएको छ।
गौर नगरपालिकाको मेयर र उपमेयर दुबै जितेको छ। ९ मध्ये ६ वडाअध्यक्ष पनि एकीकृत समाजवादीले जितेको छ। राजदेवी नगरपालिकाको मेयर र उपमेयरसहित ९ मध्ये ७ वडाध्यक्ष एकीकृत समाजवादीले जितेको छ।
यमुनामाई गाउँपालिकामा १ वडाध्यक्ष जितेको छ भने माधवनारायण नगरपालिकामा पनि एकीकृत समाजवादीले ३ वडाध्यक्ष जितेको छ।
यो क्षेत्रमा माधवनारायण नगरपालिका, गढीमाई नगरपालिकाका वडाहरू ६, ७, ८, गरूडा नगरपालिकाको वडा नम्बर १ सहित यमुनामाई, दुर्गाभगवती गाउँपालिका र राजदेवी नगरपालिका पर्छन्।
नेपाल रौतहटमा उठेको खण्डमा काठमाडौं-२ बाट एकीकृत समाजवादीकी नेता रामकुमारी झाक्री उठ्ने सम्भावना छ।
काठमाडौंमा एकीकृत समाजवादी सबैभन्दा बलियो भएको निर्वाचन क्षेत्र नम्बर-२ नै हो।
स्थानीय तहको निर्वाचनमा एमालेले यो क्षेत्रमा पर्ने वडाहरूमा १७ हजार ३ सय २५ मत पाएको छ भने कांग्रेसले १४ हजार १ सय २८ मत पाएको छ। यो क्षेत्रमा एकीकृत समाजवादीले ८ हजार ७४ मत पाएको छ। त्यस्तै राप्रपाले ७ हजार २ सय र माओवादी केन्द्रले ३ हजार १ सय ३१ मत पाएको छ।
यस क्षेत्रमा काठमाडौं महानगरका वडा नं ९ र ३२ वडा पर्छन्। कागेश्वरी मनोहरा नगरपालिकाका वडा नं ४, ५, ६, ७, ८ र ९ अनि शंखरापुर नगरपालिका पर्छ।
