सरकारले मंसिर ४ गते संघीय संसद र प्रदेश सभाको चुनाव गर्ने निर्णय गरेसँगै राजनीतिक दलहरूले अहिले चुनावी तयारीमा जुटेका छन्।
केही दलहरूले चुनावपछि सरकार चलाउने गरी मत ल्याउने लक्ष्य बनाएका छन् केही दलको लक्ष्य राष्ट्रिय पार्टी बन्ने छ।
गत चुनावमा राष्ट्रिय पार्टी बन्न नसकेको राष्ट्रिय प्रजातन्त्र पार्टी र पहिलो पटक संसदीय चुनाव सामना गर्न लागेको नेकपा (एकीकृत समाजवादी) यसपालि राष्ट्रिय पार्टी बन्छन् कि बन्दैनन् भन्नेमा आमचासो छ।
गत स्थानीय चुनावको मतलाई आधार मान्ने हो भने यी दुई दलको लोकप्रिय मत ३ प्रतिशतभन्दा बढी छ।
गत स्थानीय चुनाव वडाध्यक्षका उम्मेदवारले पाएको मतलाई आधार मान्ने हो भने राप्रपाले ३ लाख ६५ हजार ८ सय ५९ मत ल्याएको छ। वडाध्यक्षमा खसेको जम्मा सदर मत १ करोड १५ लाख ४ हजार ३८ थियो। राप्रपा उम्मेदवारले ३.१६ प्रतिशत मत ल्याएका छन्।
६ हजार ७ सय ४३ वडामध्ये राप्रपाले जम्मा ३ हजार ६३ वडामा अध्यक्ष उम्मेदवार उठाएको थियो। यीमध्ये जम्मा ५३ वडामा अध्यक्ष जितेको छ।
पढ्नुस्: लिङ्देनको नेतृत्वमा राप्रपा बन्ला राष्ट्रिय पार्टी? कति छ लोकप्रिय मत
पहिलो पटक चुनाव लडेको नेकपा (एकीकृत समाजवादी) वडाध्यक्ष उम्मेदवारले पाएको मत भने राप्रपाको भन्दा धेरै छ।
गत वैशाख ३० गते भएको स्थानीय चुनावमा वडाध्यक्षका उम्मेदवारले पाएको मतलाई आधार मान्दा एकीकृत समाजवादीको लोकप्रिय मत ३.६६ प्रतिशत छ। वडाध्यक्षमा खसेको सदर मत १ करोड १५ लाख ४ हजार ३८ मतमध्ये एकीकृत समाजवादीका उम्मेदवारले ४ लाख २२ हजार ७ सय ३७ मत पाएका छन्।
पढ्नुस्: कति छ एकीकृत समाजवादीको लोकप्रिय मत, बन्ला राष्ट्रिय पार्टी?
एकीकृत समाजवादीले देशभरि २ हजार ४१ वडामा उम्मेदवारी दिएको थियो। तीमध्ये १ सय ९० वडामा उसका उम्मेदवारले अध्यक्ष जितेका छन्। एकीकृत समाजवादीले सबैभन्दा धेरै मत मधेस प्रदेशमा पाएको छ। मधेसमा ७ सय ९ वडाध्यक्षमा उम्मेदवारी दिँदा ८० वडाध्यक्ष समाजवादीबाट विजयी भएका छन्। मधेसमा समाजवादीका वडाध्यक्ष उम्मेदवारले १ लाख ५८ हजार १ सय १ मत ल्याएका छन्।