नेपाल समाजवादी पार्टीका अध्यक्ष बाबुराम भट्टराई नेकपा माओवादी केन्द्रको केन्द्रीय कार्यालय पेरिशडाँडा पुगेका छन्।
नेकपा माओवादी केन्द्रका अध्यक्ष पुष्पकमल दाहालसँग कुराकानी गर्न उनी आज दिउँसो पेरिशडाँडा गएका हुन्।
भट्टराईसँगै समाजवादी पार्टीका अर्का अध्यक्ष महिन्द्र यादव तथा सहअध्यक्ष गंगा श्रेष्ठ पनि पेरिशडाँडामा छन्। उनीहरूले प्रचण्डसहित माओवादी नेताहरूसँग छलफल गरेका छन्।
मंगलबार बिहान बसेको माओवादी स्थायी समिति बैठकले बाबुरामलाई माओवादीको चुनाव चिन्ह लिन दिने निर्णय गरेको थियो। बाबुराम गोरखा २ मा चुनाव लड्ने तयारीमा छन्।
बाबुरामनिकट एक नेताका अनुसार प्रचण्डलगायत नेताहरूसँग बाबुरामसहित समाजवादी नेताले भेटवार्ता गरेका हुन्। मंसिर ४ मा हुने प्रतिनिधि सभा र प्रदेश सभा चुनावमा कसरी जाने भन्नेलगायत विषयमा उनीहरूबीच छलफल भएको छ।
सिट बाँडफाँटलगायत समसामयिक राजनीतिक घटनाक्रमबारे उनीहरूबीच छलफल भएको छ। आजै निर्वाचन आयोगमा प्रचण्ड र बाबुराम पनि जान सक्ने एक नेताले बताए।