नेकपा माओवादी केन्द्रका पोलिटब्यूरो सदस्य एवंम पूर्वसांसद हेमराज भण्डारीले पार्टीबाट राजीनामा दिएका छन्।
पार्टीबाट राजीनामा दिएका भण्डारीले धनकुटाबाट स्वतन्त्र रूपमा निर्वाचन लड्ने घोषणा समेत गरेका छन्।
भण्डारीका अनुसार धनकुटाको पार्टी जिल्ला समन्वय समितिका पदाधिकारी तथा सदस्यहरूले समेत राजीनामा दिएका छन्।
नेकपा माओवादी धनकुटा संयोजनक डिल्लीराम राई (कमल) ले विज्ञप्ति जारी गर्दै जिल्ला समन्वय समितिको बैठक बसेर सबैले राजीनामा दिएको उल्लेख गरेका हुन्।
उनले भण्डारीको अभियानलाई साथ दिएको समेत उल्लेख गरेका छन्।
आफूले भदौ २९ गते नै पार्टीमा राजीनामा दिएको र शनिबार जिल्लामा समेत जानकारी दिएको बताए।
'मैले पहिला नै राजीनामा दिएको थिएँ। पार्टीमा गोप्य राखिएको थियो। अब निर्वाचन लड्ने छु,' उनले भने, 'गठबन्धनका नाममा जनतामा जानै नदिने गलत प्रवृत्तिको विरूद्धमा विद्रोह गरेको हो। अब धनकुटाका जनतामाझ स्वतन्त्र रूपमा जानेछु।'
भण्डारीले २०६४ सालको पहिलो संविधान सभा निर्वाचनमा धनकुटाबाट निर्वाचन जितेका थिए।