कञ्चनपुर-३ बाट प्रतिनिधिसभा सदस्यमा निर्वाचित रमेश लेखकले अहिलेको सत्ता गठबन्धलाई निरन्तरता दिन प्रधानमन्त्रीमा शेरबहादुर देउवा नै राम्रो विकल्प रहेको बताएका छन्।
नेपाली कांग्रेसका केन्द्रीय सदस्य तथा पूर्वमन्त्री लेखकले महेन्द्रनगरमा एक सार्वजनिक कार्यक्रममा यस्तो बताएका हुन्।
‘गगन थापा प्रम बन्न लायक हुनुहुन्छ, योग्य हुनुहुन्छ, बन्नुपर्छ तर तत्कालका लागि यो गठबन्धनलाई निरन्तरता दिन शेरबहादुरजी अझ राम्रो हुन्छ कि भन्ने कुरा हो नि त, यसमा हामीमा धेरै मतान्तर हाम्रा बीचमा छैन,’ उनले भने।
लेखकले व्यवस्था र संविधान पटक/पटक परिवर्तन गरिएको र अब आर्थिक प्रगतिको समय आएको बताए। यहाँको आर्थिक विकासका लागि स्थायी व्यवस्था चाहिने उनको भनाइ छ।
‘व्यवस्थाको स्थायित्व नभए फेरि हामी राजनितिक झमेलामा पर्छौं, व्यवस्थाको स्थायित्वका लागि यो गठबन्धन निरन्तर रहनुपर्छ,’ उनले भने।
अहिलेको गठबन्धनलाई प्रधानमन्त्री तथा नेपाली कांग्रेसका सभापति शेरबहादुर देउवाले नेतृत्व गरिरहेका छन्।
उनले नै नेतृत्व गरेर यो गठबन्धन बनेको लेखकको भनाइ छ।
‘उहाँले नै नेतृत्व गरेर यो गठबन्धन अगाडि बढेको हुनाले उहाँले नै नेतृत्व गर्दा यो गठबन्धन सहज रूपमा अगाडि जान्छ कि भन्ने मेरो भनाइ हो,’ उनले भने।
लेखकले यसको मतलब अरू प्रधान्मन्त्री बन्न हुँदैन भन्ने होइन भन्दै युवालाई अवसर दिनुपर्नेमा दुई मत नहुने पनि बताए। यसका लागि संसदीय दलको नेता हुनुपर्ने कुरा उनले प्रस्ट पारे।
