सत्ता गठबन्धनका लागि नेकपा (एमाले) र नेकपा (माओवादी केन्द्र) का नेताहरू अनौपचारिक संवादमा जुटेका छन्।
निर्वाचनको परिणाम आएसँगै एमाले अध्यक्ष केपी ओलीले नेकपा माओवादी अध्यक्ष पुष्पकमल दाहाल ‘प्रचण्ड’लाई फोन गरेर बधाई आदान-प्रदान गरेका थिए। त्यसपछि एमाले र माओवादी नेताहरूको कुनै न कुनै तरिकाले भेटघाट भइरहेको छ।
दुई पार्टीको संवादमा एमालेका उपाध्यक्ष विष्णु पौडेल, सुवास नेम्वाङ उपमहासचिव पृथ्वीसुव्बा गुरूङलगायत सक्रिय छन्। त्यस्तै माओवादी केन्द्रका तर्फबाट वरिष्ठ उपाध्यक्ष नारायणकाजी श्रेष्ठ र महासचिव देव गुरूङ सक्रिय छन्।
केही दिनअघि एमालेका पोलिटब्युरो सदस्य महेश बस्नेत प्रचण्ड निवास खुमलटार पुगेका थिए। एमालेका सचिव रघुवीर महासेठ पनि बधाई आदान-प्रदान गर्ने भनेर खुमलटार पुगेका थिए।
एमाले उपाध्यक्ष बिष्णु पौडेलले प्रचण्डलाई भेटेर वाम गठबन्धनको लागि प्रयास पहल गर्नुपर्ने बताएका छन्। पौडेलले प्रचण्डलाई निवास बाहिर भेटेको स्रोतको दाबी छ।
वाम गठबन्धनको सम्भावनाबारे छलफल गर्न प्रचण्डले पार्टी उपाध्यक्ष श्रेष्ठ र महासचिव गुरूङलाई बालकोट पठाइसकेका छन्।
स्रोतका अनुसार एमाले अध्यक्ष केपी शर्मा ओली वाम गठबन्धन बनाउन तयार छन् तर त्यसका लागि अहिलेको गठबन्धन तोड्नु पर्ने सर्त राखेका छन्। अहिलेकै गठबन्धन कायम रहेमा पाँच वर्षसम्म सत्ता बाहिर रहनुपर्ने बुझाइ ओलीको छ। त्यसैले ओली सत्ता गठबन्धन भत्काउन चाहन्छन्। प्रधानमन्त्रीसँगै राष्ट्रपति, उपराष्ट्रपति, सभामुख, उपसभामुख, प्रदेश प्रमुख र सात प्रदेशका सरकारको बाँडफाँट हुने भएकाले ओली थप सक्रिय बनेका छन्।
स्रोतका अनुसार प्रचण्ड भने अहिलेकै गठबन्धनमा बस्न चाहन्छन् तर उनी सुरूमा प्रधानमन्त्री हुन चाहन्छन्। प्रचण्ड र प्रधानमन्त्री शेरबहादुर देउवाबीच कार्यकाल बाँड्ने विषयमा सहमति भए पनि पहिलो कार्यकालमा को हुने भन्नेमा विवाद छ।
एमाले-माओवादी गठबन्धन भएमा उनीहरूसँग १ सय १० सांसद छन्। राप्रपासँग १४ जना सांसद छन् भने जसपासँग १२ र नेकपा एकीकृतसँग १० सांसद छन्। यो गठबन्धनसँग १ सय ४६ सांसद पुग्ने अनुमान छ। २० सांसद भएको रास्वपाका अध्यक्ष रवि लामिछानेले समेत ओली र प्रचण्डलाई भेटिसकेका छन्।