देशका विभिन्न जिल्लामा डुबेर र खोलाले बगाउँदा छ जनाको मृत्यु भएको छ भने तीन बेपत्ता रहेको प्रहरीले जनाएको छ।
गुल्मी: धुर्कोट गाउँपालिका-२ पिपलधारा पटौतीका ६४ वर्षीय भीमबहादुर कुँवरको सोही ठाउँस्थित पनाह खोला तर्ने क्रममा खोलाले बगाएर शनिबार दिउँसो मृत्यु भएको छ।
सिराहा: सिरहा नगरपालिका-१५ बुधौराका सूर्यनारायण यादवको छोरा २ वर्षीय अन्नकेतकुमार यादवको पोखरीमा डुबेर शनिबार दिउँसो मृत्यु भएको छ। आफ्नै घर अगाडि रहेको पोखरीमा खेल्ने क्रममा डुबेर घाइते भएका उनको उपचारको लागि जिल्ला अस्पतालतर्फ लैजाँदै गर्दा शनिबार दिउँसो बाटोमै मृत्यु भएको हो।
सुर्खेत: वीरेन्द्रनगर नगरपालिका-१० बामेखोलाका १८ वर्षीय लक्ष्मण राना क्षेत्रीको बामेखोलामा नुहाउन गएको अवस्थामा खोलामा डुबी शनिबार साँझ मृत्यु भएको छ।
सर्लाही: ब्रम्हपुरी गाउँपालिका-५ सखुहवा बस्ने अनिल रायकी ६ वर्षीया छोरी माहीकुमारी रायको घर नजिकैको पोखरीमा नुहाउने डुबेर मृत्यु भएको छ। उपचारको लागि जिल्ला अस्पताल लैजाँदै गर्दा शनिबार दिउँसो बाटोमै मृत्यु भएको हो।
धनुषा: चारनाथ नगरपालिका-७ स्थित कमला नदीमा डुबेर सिरहा मिर्चैया नगरपालिका-६ बस्ने सञ्जीव साहकी १० वर्षीया छोरी प्रकृतिकुमारी साहको मृत्यु भएको छ।
उक्त नदीमा नुहाउन गएको अवस्थामा डुबेर बेहोस् भएकी उनको समर मेडिकल गोदार धनुषामा उपचारको क्रममा शनिबार दिउँसो मृत्यु भएको हो।
महोत्तरी: बर्दिबास नगरपालिका-१२ चल्की टोलस्थित पोखरीमा डुबेर धनुषा क्षिरेश्वरनाथ नगरपालिका-५ की ३० वर्षीया मीना सुवेदीको शनिबार साँझ मृत्यु भएको छ।
बल्छी लगाएर माछा मार्ने क्रममा सोही पोखरीमा डुबेर उनको मृत्यु भएको हो।
पाँचथर, तुम्बेवा गाउँपालिका-१ स्थित खोटाङ बारापोखरी गाउँपालिका-४ का २१ वर्षीय महेश राई शनिबार दिउँसो तमोर नदीमा नुहाउन गएकोमा नदीले बगाउँदा बेपत्ता भएका छन्।
उनको खोजी भइरहे पनि फेला पार्न नसकिएको प्रहरीले जनाएको छ।
म्याग्दी: बेनी नगरपालिका-२ बगरफाँटस्थित खहरे खोलामा आएको बाढीमा परी शनिबार राति सोही स्थानकी पार्वती परियारकी १० वर्षीया छोरी प्रविणा परियार र अनिता परियारकी ६ वर्षीया छोरी अनुष्का परियार बेपत्ता भएका छन्।
बाढीले सोही स्थानमा रहेको बुद्ध बोर्डिङ स्कुलमा क्षति पुर्याएको छ। जिल्ला प्रहरी कार्यालयबाट खटिएको प्रहरी टोलीले स्कुलका ५ जना शिक्षक र १२ जना विद्यार्थीको उद्धार गरेको छ।
खोला नजिकका स्थानीयबासीहरूलाई सुरक्षित स्थानमा सारेको छ।
