झापामा एक वृद्धा मृत फेला परेकी छन्।
गौरादह नगरपालिका-१ की ६५ वर्षीया मनमाया भण्डारीको आफ्नै घरमा खाटमुनि शव फेला परेको जिल्ला प्रहरी कार्यालयका प्रहरी नायब उपरीक्षक डिएसपी राकेश थापाले जानकारी दिए।
सोमबार दिउँसो साढे ४ बजे घटनाबारे स्थानीयले प्रहरीलाई खबर गरेको थियो।
'घरमै मृत अवस्थामा वृद्धाको शव फेला परेको छ,'डिएसपी थापाले भने,'उनको हात बाँधिएको अवस्थामा शव फेला परेको हो।'
उनका अनुसार भण्डारीको टाउकोमा समेत चोटपटक लागेको छ।
'उनको टाउकोबाट पनि धेरै रगत बगेको छ ,'उनले भने।
उनको हत्या गरिएको हुन सक्ने आशंका गरिएको छ।
डिएसपी थापाका अनुसार अहिलेसम्म कोही पनि पक्राउ परेका छैनन्। घटनाबारे बुझ्न एसपीसहितको टोली घटनास्थलमा पुगेको छ।
