नर्वेका ८३ वर्षीय राजा हेराल्ड पाँचौँ एक हप्ता विरामी विदामा बस्ने जानकारी त्यहाँको दरबारले दिएको छ।
गत हप्ता श्वासप्रश्वासको समस्या देखिएपछि अस्पताल भर्ना भई उपचारपछि सोमबार घर फर्किएका उनलाई एक साता आराम गर्न चिकित्सकले सल्लाह दिएको बताइएको छ।
अस्पतालद्वारा जारी एक विज्ञप्तिमा भनिएको छ, 'उहाँको स्वास्थ्य अवस्थाको अस्पतालले समीक्षा गरिरहेको छ। हेराल्ड आगामी अक्टोबर ४ गतेसम्म विदामा बस्नुहुनेछ।'
उनान्तीस वर्षदेखि नर्वेको राजागद्दीमा रहेका राजा हेराल्डलाई शुक्रवार बिहान ओस्लो विश्वविद्यालय अस्पतालमा भर्ना गरिएको थियो।
उनलाई श्वासप्रश्वासको समस्या रहेको तर कोभिड–१९ सङ्क्रमण भने नभएको दरबारले जनाएको छ।
उनको अनुपस्थितिमा राजकुमार हाकनले अस्थायी रूपमा जिम्मेवारी सम्हाल्ने व्यवस्था गरिएको छ।
सन् १९६४ को टोकियो ओलम्पिकमा भाग लिएका उनी युवाअवस्थामा जलक्रिडामा रमाउने गर्थे।
राजा हेराल्डलाई नर्वेजियालीहरूले एकताका प्रतीकका रूपमा हेर्छन्।
उनले स्वास्थ्यमा देखिएको समस्याका कारण तत्काल गद्दी त्याग्ने विचार लिइनसकेको बताइएको छ।
उनलाई जनवरीमा पनि चक्कर लागे पछि अस्पतालमा एक हप्ता राखिएको थियो।
करिब २० वर्ष पहिले उनको मुत्राशयमा क्यान्सर देखिएपछि शल्यक्रिया गरिएको थियो। त्यसपछि सोही दशकमा मुटुको ‘भल्भ’ को पनि उपचार भएको थियो।