सल्यानका एक किशोरमाथि तुलसीपुरमा आइतबार राति खुकुरी प्रहार भएको छ।
बागचौर ७ का १७ वर्षीय दण्डवीर खड्का खुकुरी प्रहारवाट गम्भीर घाइते भएका छन्।
घाइते खड्कालाई तुलसीपुरस्थित राप्ती प्रादेशिक अस्पतालमा उपचारपछि थप उचाकार लागि राति नै बाँकेस्थित कोहलपुर मेडिकल कलेजमा रेफर गरिएको छ।
इलाका प्रहरी कार्यालय तुलसीपुरका प्रवक्ता प्रहरी निरीक्षक झलक शर्माका अनुसार घाइते खड्काको घाँटीको बायाँ भागमा गहिरो घाउ लागेको छ।
खड्कामाथि तुलसीपुर उपमहानगरपालिका वडा नम्बर ६ बरुवा गाउँस्थित शिव चौधरीले सञ्चालन गरेको मदिरा तथा किराना पसल बाहिर राति ९ बजेतिर खुकुरी प्रहार भएको प्रहरी निरिक्षक शर्माले जानकारी दिए।
मदिरा पसल सञ्चालक १९ वर्षीय चौधरीका भाइ १५ वर्षीय दिपेश चौधरी र सोही ठाउँकै १५ बर्षकै सन्देश सुनारले खड्कामाथि खुकुरी प्रहार गरेको आरोप छ।
‘मदिरा सेवनपछि सामान्य वादविवाद भएको रहेछ। अलि महंगो भाउ लगाउनु भयो भनेर खड्का र उनका साथीहरुले गुनासो गरेछन्,’ प्रहरी निरिक्षक शर्माले भने ‘ तर उनीहरुमाथि पैसा तिरेर बाहिर निस्किएपछि ढुकेर बसेकाहरुले एकाएक खुकुरी प्रहार गरेका रहेछन्।’
खड्कामाथि खुकरी प्रहार भएपछि उनका साथीहरु भागेको र खड्का पनि झन्डै ५०० मिटर जति दौडिएर भागेको प्रहरीले जानकारी दिएको छ।
घाइते खड्का तुलसीपुर ६ बरुवागाउँकै बिजय फर्निचर उद्योगमा काम गर्दै आएका थिए।
घाइते खड्का पनि आफ्ना ३/४ जना साथीहरुका साथ त्यहाँ मदिरा सेवन गर्न पुगेको भन्ने खुल्न आएको प्रहरी निरीक्षक शर्माले बताए।
पसल सञ्चालक चौधरीले सामान्य बिवादपछि आफ्नो भाइलाई फोन गरेर सहयोगका लागि बोलाएको देखिन आएको प्रहरीले बताएको छ।
यसैबीच प्रहरीले पसल सञ्चालक चौधरी,उनका भाइ र आक्रमणमा संलग्न सुनारलाई गए राति नै नियन्त्रणमा लिएको छ।