काठमाडौंको बानेश्वरमा एक महिलाको शव फेला परेको छ।
बिहीबार बिहान करिब सवा ६ बजे बानेश्वर क्यापस नजिकैको फलामे पुलमुनी बागमती नदी किनारमा शव फेला परेको महानगरीय प्रहरी परिसर काठमाडौंका प्रहरी उपरीक्षक रमेश बस्नेतले जानकारी दिए।
अन्दाजी ५०-५२ वर्षीया महिलाको शव फेला परेको प्रहरीले जनाएको छ। कतैबाट बगाएर ल्याएपछि त्यहाँ अड्किएको हुनुपर्ने प्रहरीले आशंका गरेको छ। महिलाको सनाखत हुनसकेको छैन।
बिहान स्थानीयले शव देखेपछि प्रहरीलाई खबर भएको थियो। महानगरीय प्रहरी वृत्त बानेश्वरबाट प्रहरीको टोली घटनास्थल पुगेको थियो।
महिलाको शव पोष्टमार्टमको लागि महाराजगन्जस्थित टिचिङ अस्पताल पठाइएको छ। पोष्टमार्टमपछि घटना शंकास्पद भए/नभएको बारे खुल्ने प्रहरीले जनाएको छ।