मोरङको लेटाङमा महिला प्रहरी जवानको मृत्यु भएको घटनामा छानबिन गर्न प्रहरी वरिष्ठ उपरीक्षक (एसएसपी)को नेतृत्वमा समिति गठन भएको छ।
बुधबार १ नम्बर प्रदेश प्रहरी कार्यालयले एसएसपी राजेन्द्रप्रसाद चौधरीको नेतृत्वमा छानबिन समिति गठन भएको हो।
उनको नेतृत्वमा पाँच सदस्यीय समिति गठन गरेको कार्यालयका प्रवक्ता प्रहरी उपरीक्षक (एसपी) नवीनराज राईले जानकारी दिए।
‘घटना के-कसरी भयो। के कस्तो कमजोरी भए भन्नेबारेमा अनुसन्धान गर्न समिति गठन गरेको हो,’ उनले भने।
छानबिनको प्रतिवेदन बुझाउन समय सीमा भने नतोकिएको उनले बताए।
गत आइतबार लेटाङ नगरपालिका-१ स्थित शिक्षा माविमा प्रहरी र स्थानीयबीच झडप भएको थियो।
चैत ४ गते होलीका दिन एक शिक्षक छात्राको घरमा पुगेका थिए। घरमा पुग्ने बित्तिकै उनले छात्रासँग पानी मागेका थिए। पानी ल्याएर दिने क्रममा ती शिक्षकले छात्रामाथि दुर्व्यवहार गरेको आरोप छ।
त्यसै विषयमा विद्यालयमा छलफल हुँदा उग्र रूप लिएको हो।
प्रहरीले ती शिक्षकलाई पक्राउ गर्न जाँदा उनालाई बचाउन खोजेको भन्दै भीडले प्रहरीमाथि नै आक्रमण गरेको थियो। त्यसक्रममा एक महिला प्रहरी जवान उर्मिला श्रेष्ठको मृत्यु भएको हो।
त्यस्तै प्रहरी उपरीक्षक जनार्दन जिसीसहित ३० जना घाइते समेत भएका थिए।
अहिले सबै जना उपचारपछि आराम गरिरहेको जिसीले बताए। यस घटनामा प्रहरीले केही व्यक्तिहरूलाई नियन्त्रणमा लिएर सोधपुछ समेत गरिरहेको छ।
तर अनुसन्धानकै क्रममा रहेको उनले बताए।
हाल लेटाङमा कर्फ्यू जारी छ। बुधबारदेखि भने कर्फ्यूलाई मोरङ प्रशासनले खुकुलो बनाएको छ।
