कोरोनाको पहिलो र दोस्रो लहरताका संक्रमणको ‘इपिसेन्टर’ नै बनेको विराटनगरमा अहिले फेरि संक्रमित संख्या बढ्न थालेको छ।
यसपटक मोरङ कारागारमा २३ जनाभन्दा बढीमा संक्रमण पुष्टि भएपछि विराटनगरमा सतर्कता अपनाउन प्रशासन र महानगरले अपिल जारी गरेका छन्।
जिल्ला प्रशासन र विराटनगर महानगरले स्वास्थ्य सतर्कता अपनाउन, मास्क अनिवार्य लगाउन सर्वसाधारणलाई अपिल गरेका छन्।
विराटनगर क्षेत्रमा लामो समयदेखि कोरोना संक्रमण मत्थर थियो। गएको साता कारागारका १६ जना कैदीबन्दीलाई एकैपटक उच्च ज्वरोसहितको लक्षण देखिएपछि परीक्षण गरिएको थियो। त्यसक्रममा उनीहरुलाई कोरोना संक्रमण पुष्टि भएको थियो। अहिले संक्रमित कैदीबन्दीको संख्या २३ पुगेको छ।
कैदीहरुमा धमाधम कोरोना संक्रमण पुष्टि भएपछि जनस्वास्थ्य कार्यालयले कैदीबन्दीहरुलाई कोरोनाविरुद्धको खोप दिन थालेको छ। दुई दिनयता ६२० जना कैदीबन्दीलाई खोप दिइएको जिल्ला प्रशासन कार्यालयले जनाएको छ।
कूल ३५० जना क्षमताको मोरङ कारागारमा एक हजारभन्दा बढी कैदीबन्दी खचाखच छन्।
