काठमाडौं महानगरपालिकाले बागबजारको पार्किङ खाली गरेपछि व्यसायीले विरोध गरेका छन्।
पहिलेदेखि नै पार्किङ गर्दै आएको ठाउँमा राखिएका सवारीसाधन बिहीबार नगर प्रहरीले उठाएपछि व्यवसायी आन्दोलित भएका हुन्।
दुई सातादेखि नै माइकिङ गरेर उक्त क्षेत्रमा पार्किङ नगर्नू भने पनि सर्वसाधारणले नमाने पछि आफूहरूले बाध्य भएर हटाएको महानगरका नगर प्रहरी नायब उपरीक्षक दिनेश अर्यालले जानकारी दिए।
अर्यालका अनुसार कालोपत्र गरेको सडकमा पार्किङ गर्न नपाउने नियम नै भए पनि सर्वसाधारणले टेरेका थिएनन्।
‘कालोपत्र गरिएको सडकमा पार्किङ गर्न पाइदैँन,’ उनले भने, ‘तर पनि पार्किङ गरिरहेका हुन्छन्। बाटोभरी पार्किङ गरेर हिँड्न ठाउँ नै हुँदैन।’
उनले न्यूरोडलगायतका ठाउँमा स्मार्ट पार्किङका लागि अनुमति दिए पनि बागबजार क्षेत्रमा अनुमति नदिएको बताए।
व्यवसायीले भने सिटी मार्केट जस्ता ठाउँमा नक्सामै पार्किङ उल्लेख गरिए पनि महानगरले सवारीसाधन हटाएको व्यवसायीले आरोप लगाएका छन्। उनीहरूले पार्किङको व्यवस्था मिलाउन माग राखेका छन्।
नगर प्रहरी उपरीक्षक अर्यालले भने पार्किङ खुलाउन वडाध्यक्षसँग समन्वय भइरहेको बताए।