काठमाडौं उपत्यका ट्राफिक प्रहरीले ट्राफिक नियम उल्लंघनको जरिवाना बढाएको छ।
काठमाडौं उपत्यका ट्राफिक प्रहरी कार्यालय रामशाहपथले पुस महिनादेखि लागू हुने गरी जरिवाना रकम बढाएको प्रवक्ता एवं प्रहरी वरिष्ठ उपरीक्षक (एसएसपी) राजेन्द्रप्रसाद भट्टले जानकारी दिए।
ट्राफिक नियमका १६ शीर्षकमा जरिवाना बढाएको हो।
यसअघि यी विभिन्न शीर्षकमा ५०० देखि १५०० रूपैयाँसम्म जरिवाना लाग्दै आएको थियो। तर अब यी शीर्षकमा न्यूनतम १५०० रूपैयाँ जरिवाना हुनेछ।
‘पहिले न्यूनतम ५०० देखि अधिकतम १५०० रूपैयाँसम्म जरिवाना हुने कसूर अन्तर्गतमा रहेका १६ वटा शीर्षकमा अब न्यूनतम नै १५०० रूपैयाँ जरिवाना गर्ने निर्णय भएको हो,’ उनले सेतोपाटीसँग भने, ‘पुस ३ गतेदेखि यो लागू गरेका छौं।’
२०७५ सालमा प्रत्यायोजित अधिकारको प्रयोग गरी जरिवाना रकम बढाइएको उनले बताए।
यसरी जरिवाना बढाउँदा ट्राफिक नियमको पालना गरिने र दुर्घटनासमेत न्यूनीकरण हुने उनको भनाइ छ। यद्यपि जरिवाना बढाइसकेपछि पनि ट्राफिक नियम उल्लंघनका घटना र दुर्घटना न्यूनीकरण भए/नभएबारे बताउने बेला नभएको उनले बताए।
एक-दुई महिनामा यसबारे केही परिणाम आउने उनले बताए।
‘जरिवाना र कारबाही गर्दा पनि नियम उल्लंघन गर्ने गरेको पाइयो। दैनिकजसो तीनदेखि चार हजारसम्म उल्लंघन गर्नेहरू हुन्छन्,’ उनले भने, ‘५ सय रूपैयाँ त हो नि भनेर पटकपटक तिर्नेहरू देखियो। अनि उल्लंघन गरेको गर्यै, जरिवाना बढाउँदा नियम पालना गर्लान् र दुर्घटना घट्छ कि भनेर हो।’
मंसिर महिनामा मात्रै ट्राफिक प्रहरीले ५ पटक भन्दा बढी ट्राफिक नियम उल्लंघन गर्ने ६२ जनाको लाइसेन्स नै निलम्बन गर्न यातायात विभागलाई सिफारिस गरेको थियो।
४२ पटकसम्म कारबाहीमा परेको रेकर्ड पाइएकाले पनि जरिवाना बढाएको उनी बताउँछन्।
यी हुन् न्यूनतम १५०० रूपैयाँ हुने १६ कसूरहरू:
१. ट्राफिक बत्तीले रोक्न संकेत गरेकोमा नरोकेमा
२. सवारी अड्याउन वा राख्न निषेध गरिएको ठाउँमा वा समयमा सवारी अड्याएमा वा रोकेर राखेमा
३. सवारी मोड्न निषेध गरिएको ठाउँमा सवारी मोडेमा
४. सडकमा गलत साईड तर्फबाट सवारी चलाएमा
५. एकतर्फी सडकमा सो विपरीत सवारी चलाएमा
६. अवस्था ठिक नभएको सवारी चलाएमा
७. राति बत्ती नबाली सवारी चलाएमा
८. सवारी चलाउन निषेध गरिएको ठाउँमा वा समयमा सवारी चलाएमा
९. नम्बर प्लेट नराखी सवारी चलाएमा
१०. सिटबेल्ट नबाँधी वा हेल्मेट नलगाई सवारी चलाएमा
११. सार्वजनिक सवारीको चालकले यात्री लिन इन्कार गरेमा
१२. लापरवाहीका साथ सवारी चलाएमा
१३. सवारीको वजन हद निर्धारण क्षेत्रमा बढी वजनको सवारी चलाएमा
१४. लाइसेन्स, ब्लुबुक, सवारी इजाजत पत्र साथमा नराखी सवारी चलाएमा
१५. ट्राफिक संकेत वा इशारा उल्लंघन गरी सवारी चलाएमा
१६. हर्न बजाउन निषेध गरिएको ठाउँमा हर्न बजाएमा
अन्य कसूर र जरिवाना:
१००० देखि ५००० रूपैयाँ सम्म जरिवाना हुने कसूर:
१. निर्धारित भाडादर भन्दा बढी भाडा लिई सवारी चलाएमा
१००० देखि १५०० रूपैयाँ सम्म जरिवाना हुने कसुरहरू:
१. दर्ता नगरी सवारी चलाएमा
२. विदेशमा दर्ता भएको सवारी अनुमति नलिई चलाएमा
३. बाटो इजाजतपत्र नलिई सार्वजनिक सवारीले यातायात सेवा संचालन गरेमा
१००० रूपैयाँ जरिवाना हुने कसुरहरू:
१. सवारी चालक अनुमतिपत्र प्राप्त नगरी सवारी चलाएको
२. सार्वजनिक स्थानमा बाधा पुग्ने गरी मालसामान वा सवारी राखेको
३. दुर्घटनामा परेको सवारी तथा यात्रीको हानि नोक्सानी पुर्याएको/सम्पर्कमा नआएको
४. मादक पदार्थ सेवन गरी सवारी चलाएको
५. सवारी चालक अनुमतिपत्र प्राप्त नगरेको व्यक्तिलाई सवारी चलाउन दिएमा
६. सवारीमा वस्ने वा राख्ने मानिस वा मालसामानको हद निर्धारण गरिएकोमा सो हद भन्दा बढी राखी सवारी चलाएको
७. यात्रुवाहक सार्वजनिक सवारीमा तोकिए बमोजिमको सिट सुरक्षित नराखेमा
८. सार्वजनिक सवारीमा धूमपान गरेमा
९. खतरापुर्ण मालसामानहरु ढुवानी गर्ने मालवाहक सार्वजनिक सवारीले सांकेतिक चिह्न देखिने गरी नराखी सवारी चलाएमा
१०. यात्रुबाहक सार्वजनिक सवारीमा सो सवारीको दर्ता प्रमाणपत्रमा लेखिएको सिट संख्या भन्दा बढी यात्रु राखी सवारी चलाएमा
११. लामो बाटोमा यातायात सेवा सञ्चालन गर्ने यात्रुवाहक सार्वजनिक सवारीमा कम्तीमा दुई जना चालक राखि पालैपालोसंग सवारी नचलाएमा
१२. गति निर्धारण गरिएको स्थानमा सो निर्धारित गतिभन्दा बढी वेगले सवारी चलाएमा
१३. तोकिएको ढाँचा अनुसारको टिकट जारी नगरेमा
१४. सवारीको अन्य भागमा मानिस राखेको
१५. अरू सवारीलाई खतरा हुने किसिमले सवारी राखेको
१६. प्रयोजन विपरीत सवारी चलाएको
१७. पटके बाटो इजाजत नलिई सवारी चलाएमा
1642917209.jpg)
