चर्चित गीत 'परानै दिन्छु' को दोस्रो भाग सार्वजनिक भएको छ। गायक तथा संगीतकार हरि लम्साल र गायिका मेलिना राईको स्वरमा रहेको ‘सुन न’ बोलको यो गीत सोमबार युट्युबमा सार्वजनिक भएको हो।
पहिलो भागजस्तै यो गीतमा पनि मेलिना राई र हरि लम्सालले स्वर दिएका छन्। लम्सालकै संगीत रहेको गीतका गीतकार पनि प्रल्हाद शाह नै छन्। लोकबाजाहरुको समेत प्रयोग भएको यस गीतका संगीत संयोजक रिकेश गुरुङ हुन्।
डेढ वर्षअघि सार्वजनिक 'परानै दिन्छु' गीतले हालसम्मा युट्युबमा डेढ करोड भ्यूज पाइसकेको छ। गीतको म्युजिक भिडिओमा दयाहाङ राई र लक्ष्मी बर्देवाको अभिनय विशेष मन पराइएको थियो। 'परानै दिन्छु' को सिक्वलमा पनि दया र लक्ष्मीकै जोडी दोहोरिएको छ। 'सुन न' मा पनि यी दुईको केमेस्ट्री पहिलाजस्तै जमेको छ।
निकेश खड्काको निर्देशनमा तयार भएको भिडिओ काभ्रेको पनौती नगरपालिकाको कुशादेवीमा छायांकन भएको छ। गीतमा गाउँघरमा पानी घट्टामा अन्न पिस्न जाँदा प्रेममा परेका युवा युवतीको कथा छ।
अभिनेत्री लक्ष्मीको अवधारणामा बनेको भिडिओ उत्तम हुमागाईंको छायांकनमा बनेको हो। भिडिओ सम्पादन विकास धमलाले गरेका छन्।
