आइतबारदेखिको भारी वर्षाका कारण देशभरका विभिन्न ठाउँमा सडक यातायात अवरुद्ध भएको छ।
राजधानी काठमाडौं जोड्ने कतिपय मुख्य राजमागर्को सम्पर्क नै विच्छेद भएको छ। वर्षाको सिजनमा प्रत्येक वर्ष यसैगरी बाटो अवरुद्ध भइहेको हुन्छ।
तर यो वर्ष भने अवस्था फरक छ। अघिल्ला वर्षहरुमा वर्षाको सिजनमा बाटो अवरुद्ध हुँदा पनि आवतजावतलाई हवाइ यातायातले भरथेग गर्थ्यो। तर यो वर्ष अवस्था त्यस्तो छैन।
चैत ११ देखि भएको लकडाउनमा परेको हवाइ यातायात यो वर्ष अझै ठप्प छ। बाढी पहिरोबाट मुख्य राजमार्गकै यात्रा अवरुद्ध भएपनि मान्छेहरु रोकिन बाध्य भएका छन्।
सरकारले भने भौ १ गतेदेखि हवाइ यातायात खुलाउने निर्णय गरेको छ। संस्कृति पर्यटन तथा नागरिक उड्डयन मन्त्रालयले बनाउने नयाँ नियमका आधारमा उडान सुचारु गर्ने सरकारको तयारी छ।
१/२ दिनभित्र नै नियम बनाएर उडान गर्न सकिने अवस्था पनि रहेको छ।
नेपालको अग्रणी वायुसेवा कम्पनी बुद्ध एयरले लकडाउनकै बीचमा कोरोनापछी वा संक्रमणको जोखिमकै बीचमा पनि उडानलाई सकेसम्म सुरक्षित तरीकाले गर्ने सम्बन्धीको अभ्यास तथा तयारी गरेर बसेको बताएको छ।
बुद्धका प्रबन्ध निर्देशक विरेन्द्रबहादुर बस्नेतले सरकारले यस्तो संकटको समयमा तयारीकै लागि भनेर १ महिना पछिको साटो अहिले नै उडान खोलेर जनजीवनलाई सहज पार्नुपर्ने बताए।
'सरकारले यो बीचमा आवतजावत खोलिसकेको छ। एक ठाउँबाट अर्को ठाउँमा जान यसअघि नै खुकुलो बनाइसकेको थियो। अहिले फेरि संकटको समय पनि छ। बाटोहरु अवरुद्ध भएका छन्। त्यसैले यस्तो बेला अत्यावस्यक चाहिने हवाई सेवा खुला गर्नुपर्छ जस्तो लाग्छ' वस्नेतले सेतोपाटीसँग भने।
लक्षण नदेखिएका संक्रमितबाट फैलिन नदिनकै लागि प्रोटोकल बनाउने र त्यसको पालना गर्नेमात्र कुरा भएकाले यसमा एयरलाइन्सहरु यसअघि नै तयार भइसकेकाले अहिले नै उडान खोल्नका लागि डराउनुपर्ने अवस्था नभएको उनको भनाइ छ।
'हामीले यसअघिका चार महिनामा यो सब तयारी गरेका छौ। कर्मचारी देखि यात्रुसम्मले के गर्नुपर्छ संक्रमण फैलिन नदिनका लागि भनेर तालिममात्र होइन अभ्यास पनि गरिसकेका छौ। आखिर १ महिनापछि गएर गर्ने पनि त्यही हो। यस्तो संकटको समयमा यातायातको माध्यम हवाइ यात्रा खोल्नलाई डराउनु हुँदैन' उनले भने।
यसअघि नै नेपाल नागरिक उड्डयन प्राधिकरणले उडान सञ्चालनको नियम बनाइसकेको छ।
