नागरिक लगानी कोषले नागरिक बचत वृद्धि कार्यक्रम सार्वजनिक गरेको छ । सामाजिक सुरक्षा र बचतलाई जोड दिएर उक्त कार्यक्रम ल्याएको जनाएको छ ।
कोषले सार्वजनिक गरेको नयाँ कार्यक्रममा नियमित वा निश्चित समयमा रोजगार गरि आम्दानी गरेका सर्वसाधारणदेखि गैरआवसीय नेपाली तथा वैदेशिक रोजगारीमा रहेका नेपालीहरु समेट्ने जनाएको छ ।
कुनै पनि प्रतिष्ठानमा काम गरिरहेका श्रमिकले न्यूनतम मासिक ५०० देखि आफ्नो क्षमता अनुसार कोषमा बचत गर्न सक्ने छन् । सहभागि हुन चाहाने श्रमिकले एकमुष्ठ वा अनुकुलता अनुसार पटक पटक पनि बचत गर्न सक्ने ब्यवस्था कोषले गरेको छ ।
यसरी नियमीत दुई वर्षसम्म बचत गरेमा कोषले जम्मा रकमको ८० प्रतिशत सापटीको रुपमा पनि दिने योजना बनाएको छ ।
कोषले प्रवाह गरिरहेको आवास, सरल एवं शिक्षा कर्जा जस्ता सुविधा पनि बचतकर्ताले पाउने छन् । योसँगै सहभागीहरलाई निश्चित मापदण्डको आधारमा दुर्घटना बीमा, औषधी उपचार बीमा, मृत्यु संस्कार खर्च र सुत्केरी खर्च जस्ता समाजिक सुरक्षाका सुविधाहरु समेत समावेश गर्ने कोषले जानकारी दिएको छ।
कोषमा श्रमिकले लगातार १५ वर्षसम्म रकम जम्मा गर्नुपर्ने छ। भविष्यमा बचतकर्तालाई पेन्सनको व्यवस्था गर्नेगरी विस्तार गरिने कोषको भनाइ छ ।
कोषलले यसअघि कर्मचारी बचत वृद्धि, नागरिक एकांक योजना, उपदान कोष योजना, लगानीकर्ता हिसाब योजना लगायतका विभिन्न बीमा कोषहरु समेत गरी ११ कार्यक्रम सञ्चालन गरिरहेको छ ।