हालै एनएमबि बैंकले आफ्नो नयाँ कर्जा योजना सार्वजनिक गर्यो। बैंकले ‘लोकप्रिय घर कर्जा’ लाई समयावधि बढाएर परिष्कृत गरेको हो। यो योजनामा ५ वर्षसम्म ब्याज नबढ्नेगरी ऋण लिन पाइनेछ।
११ प्रतिशतको निश्चित ब्याजदरका साथै कर्जाको अवधि अधिकतम २५ वर्ष कायम राख्दै बैंकले यो योजना ल्याएको हो।
अब बैंकबाट लिने घरकर्जामा ग्राहकले ५ वर्षसम्म ११ प्रतिशत व्याजदर तिरे पुग्नेछ। बैंकले एक विज्ञप्ति जारी गर्दै ब्याजदरमा निरन्तर भएको उत्तारचढावले उत्पन्न भएको मानसिक र वित्तीय दवाव चिर्न पृथक योजना ल्याइएको दावी गरेको छ।
एनएमबि मात्रै होइन, अन्य बैंकहरुले पनि यस्ता योजना ल्याउने गरेका छन्। नेपाल बैंकर एसोसिएसनका अध्यक्ष तथा सानिमा बैंकका प्रमुख कार्यकारी अधिकृत भुवनकुमार दाहालले केही वर्षदेखि नै बैंकहरुले फिक्स्ड रेटमा ऋण दिन थालेको बताए।
‘२/३ वर्षका लागि बैंकहरुले स्थिर व्याजदरमा ऋण दिने गरेका छन्’ उनले भने। फिक्स्ड रेटमा दिइने ऋणको व्याज सामान्यतः केही महँगो हुन सक्ने बैंकर बताउँछन्।
बैंकहरुले बीचबीचमै ब्याजदर परिवर्तन गर्दा आर्थिक भार बढेको उद्योगी व्यवसायीहरुले गुनासो गर्दै आएका छन्। ‘एउटा योजनाअनुसार व्यवसाय गरिरहेका हुन्छौं, तर बैंकले बीचमै ब्याज बढाइदिँदा आर्थिक भार थपिन्छ, अब हामीले कहाँबाट तिर्ने?’ एक व्यवसायीले भने।
घर र गाडीका लागि मात्रै केही बैंकले स्थिर व्याजदरमा ऋण दिने गरेको उनले गुनासो गरे। यद्यपी स्थिर व्याजदरमा ऋण दिने परिपाटी सुरू हुनु सकारात्मक पक्ष रहेको उनले बताए।
राष्ट्र बैंकले यसअघि नै १ वर्षभन्दा बढी भुक्तानी अवधि भएको आवधिक प्रकृतिको कर्जामा तोकिएको अवधिभर ब्याजदर परिवर्तन नहुनेगरी ऋणीसँगको सहमतिमा स्थिर व्याजदर तोक्न सकिने व्यवस्था गरेको छ।
यो व्यवस्था अनुसार ऋणीले सहमतिमा गरेको अवधिसम्म बैंकले ब्याज घटबढ गर्दैन। यसबाट ऋणीलाई फाइदा र बेफाइदा दुवै रहेको बैंकर बताउँछन्। लगानीयोग्य रकम प्रयाप्त भएर ब्याजदर घट्ने अवस्था आएमा पनि त्यो ऋणीको ब्याजदर घट्दैन भने ब्याजदर बढाउने अवस्था आएमा पनि बढ्दैन।