प्रधानमन्त्री केपी शर्मा ओलीले गौतमबुद्ध अन्तर्राष्ट्रिय विमानस्थल गएको असारमै उद्घाटन हुने सार्वजनिक रुपमै घोषणा गरेका थिए। तर उनले पछि कर्मचारीको ब्रिफमा भर परेर आफूले त्यसो भनेको स्पष्टिकरण दिएका थिए।
गएको साता संस्कृति पर्यटन तथा नागरिक उड्डयन मन्त्री योगेश भट्टराईले पनि उक्त विमानस्थल सन् २०१९ को डसेम्बरभित्रै सम्पन्न हुने बताएका छन्।
बिहिबार विमानस्थलको स्थलगत निरीक्षणमा जानु अघि उनले डिसेम्बरभित्रै सम्पन्न भएर सञ्चालन हुने उनले घोषणा गरेका थिए।
निरीक्षणमा गएपछि उनले जसरी भएपनि मंसिरभित्रै विमानस्थल सञ्चालनको वातावरण बनाउन निर्देशन दिए। सोहीअनुसार काम सम्पन्न गर्नेतर्फ अघि बढ्न कर्मचारीहरुलाई उनले निर्देशन दिएका थिए।
मन्त्री भट्टराईले भनेजस्तो विमानस्थल सन् २०१९ भित्रै सञ्चालनको त परको कुरा निर्माण नै सकिने सम्भावना छैन। विमानस्थलको एउटा ठेक्कका अन्तिम म्याद नै सन् २०२० को जनवरीसम्म रहेको छ।
आयोजनाका लागि कम्युनिकेशन, नेभिगेशन, सर्भिलेन्स,एयर ट्राफिक व्यवस्थापन सिस्टम, मौसमी साधन तथा यीसँग सम्बन्धित प्रविध आपूर्ति र जडानका लागि गरिएको ठेक्का नै जनवरी ७ २०२० सम्म रहेको छ। यो काम जनवरी ७ सम्म गरिसक्नेगरी नेपाल नागरिक उड्डयन प्राधिकरणले एरोनटिकल रेडियो अफ थाइल्यान्डसँग सम्झौता गरेको छ।
२०१९ को मार्च ७ मा ४७ लाख ७० हजार अमेरिकी डलरमा गरिएको सम्झौता अनुसार कम्पनीले अहिले काम गरिरहेको छ। यो काम कूल आयोजनाको २५ प्रतिशत भाग हो। ७५ प्रतिशत हिस्सा रहेको सिभिल तर्फको काम भने अहिलेसम्म ७४ प्रतिशत भएको छ।
यो विमानस्थलको नयाँ धावनमार्ग ,ट्याक्सी वे र एप्रोनको काम सकिएको छ। टर्मिनल भवनको काम सक्नका लागि अझै तीन महिना लाग्ने नागरिक उड्डयन प्राधिकरणले जानकारी दिएको छ। त्यस्तै कन्ट्रोल टावरको काम आठौ तलासम्म सकिएको छ भने प्राशासनिक भवन पनि निर्माणाधिन अवस्थामा छ।
सन् २०१४ देखि शुरु भएको यो आयोजना सन् २०१७ मै सक्ने लक्ष्य लिइएको थियो। ३ पटक समय थप गरी सन् २०२९ को डिसेम्बरसम्म समयसीमा तोकिएको छ।
एसियाली विकास बैंकको ऋण साहयतामा निर्माण भइरहेको विमानस्थलको भौतिक संरचनाको शुरुवाति लागत अनुमान ६ अर्ब २२ करोड थियो। अहिले बढेर यो ६ अर्ब ८२ करोड पुगेको छ।