नेपाल विद्युत प्राधिकरणका कार्यकारी निर्देशक कुलमान घिसिङले गएको चार वर्षे आफ्नो कार्यकाल सफल भएको बताएका छन्।
नेपाल विद्युत प्राधिकरणको ३५ औं वार्षिकोत्सवको अवसरमा बोल्दै घिसिङले प्राधिकरणलाई गएको चार वर्षमा प्रतिष्ठित संस्थाका रुपमा उभ्याइएको बताए। यसमा कर्मचारीदेखि सरकारसम्मको साथ र सहयोग रहेको उनले बताए।
यी सबैको साथ र सहयोगबाटमात्र सुधारको काम गर्न सम्भव भएको उनको भनाइ छ।
'हामी उज्यालो युगमा प्रवेश गरेका छौँ। यो हाम्रा लागि सबैभन्दा ठूलो उपलब्धी हो। चार वर्ष अघि हामी अँध्यारो मात्र होइन, कर्मचारीलाई तलब खुवाउन पनि सरकारको मुख ताक्नुपर्ने अवस्था थियो। गएको वर्ष मात्र हामी सबैभन्दा बढी कमाउने सार्वजनिक संस्थान भएका छौं' घिसिङले भने।
एकातिर उपभोक्ता अँध्यारोमा बस्नुपर्ने र अर्कोतिर संस्था चरम घाटामा रहेको चार वर्षअघिको अवस्था अहिले पूर्णतया उल्टिएको उनले बताए। चार वर्षअघि ३४ अर्बको सञ्चित नोक्सानीमा रहेको संस्था अहिले ४ अर्ब ८७ करोड सञ्चित नाफाको अवस्थामा पुगेको उनले बताए।
तलब खुवाउनकै लागि मुख ताक्ने अवस्थाबाट प्राधिकरण पूर्वाधार विकासका लागि आफै वित्तीय स्रोत जुटाउन सक्ने हैसियतमा पुगेको उनले बताए।
बिजुली चुहावट घटाउन तथा पहुँच विस्तारका लागि अभियानकै रुपमा काम गरिएको र त्यसको प्रभावस्वरुप ८६ प्रतिशत पहुँच विस्तार भएको उनले बताए।
बिजुली खपत पनि बढ्दै गएको र प्राधिकरणले मुनाफा कायम राख्दै महशुल पनि घटाइएको उनले जानकारी दिए। यही साउनदेखि नै बिजुलीमा घरयासी ग्राहकका लागि सहुलियत दिइएको थियो।
चार वर्ष अघि एकातिर उपभोक्ताले बिजुली नपाउने र अर्कोतिर भारतबाट आयात उच्च रहेको अवस्थामा पछिल्लो समय पहुँच र खपत बढ्दा पनि आयात तुलनात्मक रुपमा धेरै नबढेको र गएको वर्ष ३५ बाट घटेर २२ प्रतिशतमा सीमित भएको उनले बताए।
.JPG)
